Форумда жангы онгланы ачыкъларыкъдыла

«Кавказ. РФ» акционер общество август айны аллында ВДНХ-да ётерик «Путешествуй!» деген турист форумну бардырыугъа къатышырыкъды. Анда Россейде белгили турист ызланы онглары бла танышыудан сора да, жангыла бла танышдырыу да боллукъду. Глэмпинг, автотуризм, экотуризм  эм регионланы аш-суулары бла танышдырыу дегенча жангы онгланы юслеринден да толуракъ билир амал боллукъду. СКФО-ну регионлары уа анда кеслерини культураларын эм миллет азыкъларын да кёргюзтюрюкдюле.

Акционер обществону таматасы Хасан Тимижев белгилегеннге кёре, бу жол бла ала форумгъа экинчи кере къатышадыла эм аны бардырыу бийик даражада ётерча билеклик этедиле. Анда власть органланы, бизнесни да келечилери бу сфераны айнытыу жаны бла амалланы сюзедиле, бир оюмгъа келип, жангы проектлени къурауну юсюнден келишедиле.

  Дагъыда форумгъа келгенлени мастер-классла, жолоучулукъ бла кюрешген белгили блогерле бла тюбешиуле эм турист маршрутланы кёрмючю да боллукъду.

  Форумну Ростуризм къурап бардырады. Аны чеклеринде 100-ден артыкъ тюбешиуле, лекцияла эм башха сейир жумушла ётерикдиле.