Кинематографистлени кезиулю фестивалы - жарыкълыкъны, ышаныуну белгиси

Бу кюнледе Искусстволаны Шимал-Кавказ къырал институтунда «Кинокавказ-2019» аты бла Шимал Кавказны жаш тёлюсюню экинчи ачыкъ кинофестивалы баргъанды. Аны продюсерлери бу вузну бошагъанла Артём Челикин, Зарина Ажагоева эм Заур Нагоев болгъанларын энчи белгилерге керекди.

Жюрини председатели – Кинематографияны С. Герасимов атлы битеуроссей къырал институтну (ВГИК) доценти, профессионал билим алыуну эксперти Виталий Калинин, членлери уа - Искусстволаны Шимал-Кавказ къырал институтуну проректору  Беслан Ашхотов,  КъМР-ни Кинематографистлерини союузуну председатели, НОТР телеканалны директору Владимир Вороков, КъМР-ни, Ингуш республикаланы да искусстволарыны сыйлы къуллукъчусу, башда айтылгъан институтну режиссура кафедрасыны таматасы Мухамед Черкесов, КъМР-ни культурасыны сыйлы къуллукъчусу  Ботталаны Мурат эм башхала болгъандыла.

Фестивальны конкурсунда жыл санлары отуз бешден атламагъан кинематографистле кеслерини ишлерин кёргюзтгендиле. Ол кинолагъа багъа бериу тёрт номинацияда къаралгъанды: «Бек  иги къысха метражлы оюн кино»; «Бек  иги толу метражлы оюн кино»; «Бек  иги документли телевидение кино»; «Бек  иги социал ролик».

Жиберилген ишлени саны жюз бла жетмиш болгъанды.  Ала Россейни жер-жерлеринден сора да Къыргъызстандан, Къазахстандан, Франциядан, Латвиядан, Армениядан, Украинадан да келгендиле. Жюрини келечилери ишлени не темалагъа аталгъанларына, жаш кинематографистле аланы ачыкълай билгенлерине кёре сюзгендиле.

Алайды да, авторла аталаны бла сабийлени, ажашып, аман ишле этиуню жолуна тургъан жаш адамланы, жандауурлукъну, ата журтха, жанынгдагъылагъа сюймекликни, бир бирге билеклик этиуню, табийгъатны сакълауну эм башха жамауатны, адам улун окъуна, бирча сагъыш этдирген затланы юслеринден айтадыла экрандан.  Аланы хар бири да – иги айтылгъан, кёргюзтюлген хапарды, оюмду. Ол ишле сюзюлгенден сора хар бирини темасына кёре айырмалыла сайланнгандыла.

Саугъа берилген къууанчлы жыйылыуну Урусова Милана бла Мызыланы Аубекир бардыргъандыла. Анда Искусстволаны Шимал-Кавказ къырал институтуну ректору, РФ-ни экинчи даражалы советниги, искусствоведенияны доктору Рахайланы Анатолийни айтханына кёре, быллай фестивальгъа къатышыу жаш кинематографистлени усталыкъларын ёсдюреди, ала, бир бирлерин танып, бир бирлеринден юйренедиле, сынау жыядыла. Ол мында ишлерин бергенлени кино усталыкълары бла къалмай, бусагъатда жамауатны къайгъы этдирген затланы эслей, айыра билген фахмулулукълары да ачылгъанды деп белгилегенди.

Къууанчлы ингирни башында сагъынылгъан институтну КъМР-ни сыйлы артисткасы Асият Марзоева юйретген «Кавказ» ансамбли, студентлери эм Ислам бла Карина Киш дуэт ариу жырлары бла, учунуу тепсеулери бла жарытхандыла.