Гежаланы Далхат Европаны биринчилигинде сермеширикди

Краснодар крайны Анапа районунда 13-14-жыллыкъ спортчуланы араларында боксдан Росссейни биринчилиги бардырылгъанды. Анга къыралны 60-дан аслам регионундан 326 боксчу къатышхандыла, ала 20 ауурлукъ къауумда эришгендиле.

Анда уллу жетишимни Элбрус районну «Элбрус» спорт школундан Гежаланы Далхат болдургъанды. Ол, 38,5 килограмм ауурлукъда сермеше, къаршчы спортчулагъа бир очко окъуна алыргъа аз да онг бермегенди. Огъары Бахсандан гёжеф рингге тёрт кере чыкъгъанды эм тёрт тюбешиуюнде да 5:0 эсеп бла хорлагъанды. Аны талпыныууна Москва эм Тюмень областьланы, Томск бла Тюмень шахарланы келечилери тыялмагъандыла. Алай бла ол алтын майдалдан тышында 50 минг сом эм юйюрю бла бирге 10 кюнню Къара тенгизни жагъасында солургъа путёвка бла саугъаланнганды.

- Далхат низамлы, иш кёллю жашды, - дейди аны тренери Хаджиланы Тимур. – Ол жарауда къарыуун аямай кюрешеди, эришиуледе, юйреннген кезиуюнде да айтханымы толусунлай этеди. Сора, хорламгъа итиниулюгю да уллуду, рингде ахыр такъыйкъагъа дери сермешеди. Россейни биринчилигинде тюберик спортчуланы башха эришиуледе да кёре  тургъанбыз, аланы онгларын тинтгенбиз, кесибиз да иги хазырланнганбыз. Алай бла Витязевода жетишимли болурубузгъа ышана эдик да, муратыбызгъа жетгенбиз.

Далхат битеу да 54 сермеш бардыргъанды, аладан 52-де хорлагъаны тренерини сёзлерини кертилигине шагъатлыкъ этеди. Энди боксчу Европаны биринчилигине къатышырыкъды, ол  Грузияны ара шахары Тбилисиде августну аллында боллукъду. Алда уа Далхатны хазырланыу юйрениу-жарау этиу жыйылыула сакълайдыла.

Суратда: Гежаланы Далхат тренери Хаджиланы Тимур бла.