Китапларында - жашау кертилик

Бу кюнледе Май районну тарых-краевед музейинде жазыучу эм тарыхчы Олег Опрышко бла тюбешиу бардырылгъанды.  Ол адабият – краевед халда ётгенди.

Анга ол кюн тарыхчы, журналист Мария Котлярова, КъМР-ни Жазыучуланы союзуну правленини председатели Юрий Тхагазитов, «Кавказский рубеж» излеу отрядны таматасы Виктор Цыбин эм Олег Опрышкону чыгъармачылыгъын сюйген адамла келгендиле.

Олег Леонидовични юсюнден айтханда, ол Нартан элде туугъанды. Сабий заманы аскер жыллагъа тюшгенди. 1942-1943 жыллада анасы бла Май посёлокда жашагъанды. 1960 жылда Москваны тарых-архив къырал институтун бошагъанды. 1964 жылгъа дери КъМР-ни Илму-излеу институтунда археология бёлюмде илму къуллукъчу болуп ишлегенди. Археология экспедицияны санында Тёбен Джулат деген эски журтда къазыу ишлеге къатышханды.

Тарых илмуну айныууна эм жамауат ишлеге уллу къошумчулукъ этгени ючюн аны сыйлы къырал саугъалары да бардыла. Сёз ючюн, «КъМР-ни маданиятыны сыйлы къуллукъчусу» - деген ат аталгъанды, «За заслуги перед Кабардино- Балкарской республикой» орденни кавалериди. Дагъыда КъМР-ни Парламентини бла Правительствосуну эм КъМР-ни Маданият министерствосуну сыйлы грамоталары бла да белгиленнгенди.

Олег Леонидович кёп иги китапланы авторуду: «Сын ташла айтадыла», «Тарыхны жоллары бла», «Кавказ атлы дивизия.1914-1917 жылла. Жангырыу», «Къабарты - Тау реальный училищени сохталары. 1909-1920 ж.» деген эм башха чыгъармалары кёплеге белгилидиле. Алай майскечилеге «Терк къазакъла: Тарых атла» деген китап эм багъалыгъа саналады. Анда Пришибская, Котляревская, Александровская станицалада къазакълыланы жамауатлары  болгъан заманлары ачыкъланады.

Олег Опрышкону китаплары бизге, Къабарты- Малкъарда туугъанлагъа, жашагъанлагъа бизден жюз жыл алгъа жашагъан адамланы юслеринден толуракъ хапар билирге онг бередиле.