Даражалы кёрмючде – миллетни сыры

Россейни модельерлерини ассоциациясы къурап, Москвада Вячеслав Зайцевни Мода юйюню 40-жыллыгъын белгилегендиле. Анга Россейде бла СНГ-де атлары айтылгъан модельерле къатышхандыла. 

Къууанчлы жыйылыуну Ассоциацияны президенти Валентина Мельникова ачханды. Ол Вячеслав Михайловичге ыспас сёзле айтханды, аны башламчылыгъы бла къыралда атлары айтылгъан специалистлени  тышында да танып башлагъанларын чертгенди.

Озгъан ыйыкъда бардырылгъан мода ингирге уа ондан артыкъ модельер къатышханды. Аланы араларында  къарачай-малкъар халкъны келечилери Аджиланы Зарема бла  Бекболатланы Земфира да болгъандыла.  Ары аланы къарачай-малкъар халкъны маданият совети къурап ашыргъанды. 

Советни директору Биттирланы Людмила айтханнга кёре, эки модельер да бу бийик даражада бардырылгъан жумушха  къаты хазырланып, миллетибизни аты кёплени эслеринде къалырча этгендиле.

– Зареманы бла Земфираны миллет жыйрыкъларын сайлап, кёрмючню ахырына ингирни къурагъанла кеслери къойгъан эдиле. Кесигиз билгенден, шоу-бизнесде эм башха быллай жумушлада къачан да бек игиге саналгъанла артда жырлайдыла эм кёргюзтюледиле. Ма бу жол да алай болгъанды, – деп чертгенди ол. 

Дизайнерле бу коллекцияларын Катчиланы Русланны  «Хасаука» деген макъамына кёре тизип жарашдыргъандыла. Бизни миллет жыйрыкъларыбызны ариулукълары кёплени сейирсиндиргенди. Къызлагъа къарсла бла тюбеп, сахнадан кёп заманны жибермей тургъандыла. 

– Андан тышында да бизни модельерлерибизни  Москвада жууукъ заманда бардырыллыкъ талай даражалы кёргюзтюулеге къатышыргъа чакъыргъандыла, – деп билдиргенди Биттирланы Людмила.