Республикада 500 мингден аслам адам солугъандыла

2022 жылны биринчи жарымында Къабарты-Малкъаргъа солургъа 500 мингден аслам адам келгенди, былтырны аллай кезиую бла тенглешдиргенде, ол 6 процентге кёпдю.  

- Бу сезонда не да тап къуралгъанды: табийгъат болумла, кюнню халы, инфраструктура онгла, адамланы ишлеулери. Лыжалада учууну болжалы 7 айгъа дери созулгъанды – ол иги кёрюмдюдю. 
Жай да ахшы эсепле бла къууандырырына ишексизме, - дегенди республиканы курортла эм туризм министри Мурат Шогенцуков. 

Регионну къонакъларыны 70 проценти Минги тауну сайлайдыла: къышда анда – тау лыжалада учаргъа сюйгенле, жайда уа – альпинистле бла тренинг жолоучулукъла бла кюрешгенле жыйыладыла. 

Аланы асламысы 2-3-кюнлюк солуугъа келедиле, эм кёп адам солуу эм байрам кюнледе болады. Транспортну жюрюую иги болгъаны автолюбительлеге тапды. Жылны ичинде исси суулада 
саулукъларын кючлерге да кёп адам жыйылады, аллай жерле экскурсия маршрутлагъа да къошуладыла.