Эйнштейн къалай окъугъанды?

Белгили алим Альберт Эйнштейн артыкъ иги окъумагъанды, математиканы да хазна билмегенди деп кёпледен алай эшитирге боллукъду. Шёндюгю школчула осал окъугъанларыны сылтауун излегенде, юлгюге аны айтадыла. Бу хапар къайдан чыкъгъанды, ол тюзмюдю?

Кертиси уа алайды: Альберт Эйнштейн физиканы бла математиканы сабийлигинден окъуна бек уста билгенди. Школда окъугъанында, аны программасын артыгъы бла толтургъанды, бу предметледен жаланда бешле алып тургъанды.

Алай эсе, ол терс хапар неден башланнганды? Тюзюн айтханда, Швейцарияны баш политехника школуна Эйнштейн биринчи кере киралмай къалгъанды. Экзаменлени кезиуюнде физиканы эмда математиканы айырмалы бергенди, алай башха предметледен а аз-маз артха къалгъанды. Болсада бир жыл озуп, кесине да онжети жыл толгъанда, аланы да теренирек билип, ол вузгъа киргенди.

Ол бош хапарла уа тамырланып, нек унутулмай къалгъанлары да сейир болмаз. Нек дегенде, эринчек адамла кеслерини болмачылыкъларыны сылтаууна ма аланы юлгюге тутадыла. Школда осал окъугъанла да, ол ётюрюклеге ийнанып: «Мен да Эйнштейнча заманындан алгъа кесими къыйнаргъа сюймейме. Кёрюрсюз артда къаллай болсам да…», - дейдиле. Алай а не хазна болсун…