Нальчикде буз къаланы къурулушу башланнганды

КъМР-ни Башчысы Казбек Коков озгъан байрым кюн Нальчикде буз къаланы къурулушуну башланыуун къабыл кёргенди.  2-чи Тамань дивизия атлы орамда орналгъан къурулуш майданнга техника биринчи кере кирип, тийишли ишле башланнгандыла. Ол кюн мында дагъыда бу къаланы – сабий-жаш тёлю спорт кластерни биринчи объектини – проектини презентациясы да болгъанды.  

Буз къаланы планы бла шагъырей эте, КъМР-ни къурулуш эмда жашау журтла-коммунал мюлк министри Алим Бербеков анга спортну къыш тюрлюлери бла кюреширча физкультура-саулукъландырыу комплекс (ФОК) бла жалгъан бузу бла ачыкъ каток киргенин айтханды. Комплексде 317 къараучугъа жер боллукъду, анда 80-нге жууукъ спортчугъа жараула этерге онгла къураллыкъдыла. Ол битеу да  4 минг квадрат метрден артыкъ жерни аллыкъды. Эки къатлы мекямда администрация, спорт керекле жыйышдырыллыкъ отоу, кийимлени алышындырырча жер да боллукъдула. Жангы ФОК «Демография» миллет проектни «Спорт – жашауну мардасы» федерал проектини чеклеринде ишленеди. Аны 2023 жылда бошаргъа белгиленеди.

Казбек Коков быллай объект Къабарты-Малкъарда биринчи боллугъун  чертип айтханды. «Бу къалада республикалы эмда регионла аралы эришиуле бардырыллыкъдыла. Мында спортну хоккейча, керлингча, фигурное катание дегенча командалы тюрлюлерине юйренирге боллукъду. Спорт жаш тёлюбюзню бирикдирирге эмда чыныкъдырыргъа болушурукъду, саулукълу жашау бардырыргъа да себеплик этерикди»,- дегенди ол.. 

Нальчик шахарны жер-жерли администрациясыны башчысы Таймураз Ахохов а сабий-жаш тёлю спорт кластерни юсюнден хапарлагъанды. Ол 2-чи Тамань дивизия, Хужоков, Владикавказ, Осетинская атлы орамланы тийрелеринде Нальчик сууну боюнунда орналлыкъды. Планнга кёре, Нальчик черекни эки жаны да тапландырыллыкъдыла. Ол ишлени бардырыргъа муниципал келишим да этилгенди.

Парк тийреле да айбатландырыллыкъдыла.  Алайлада жаяу жолчукъла, сабийле ойнарча майданчыкъла къураллыкъдыла, чыракълары бла чыпынла орнатыллыкъдыла, шинтикле салынырыкъдыла,  ичер суулары бла фонтанчыкъла да ишленирикдиле. Быйыл тамамланыллыкъ жумушлагъа  сууну бойну - Осетинская орамдан башлап Идаровагъа  дери – тапландырыллыкъды,   ол санда велосипед жолчукъ да ишленирикди.

 Республиканы Башчысы  спорт объектлеге барыргъа тынч болур ючюн,  къошакъ халда кёпюрле салыргъа кереклисин эсгертгенди, аланы проектлерин жарашдырыргъа да буюргъанды.
 Жылны ахырына дери Россейни баскетболдан федерациясыны башламчылыгъы эмда ПСБ-банкны себеплиги бла кластерни тийресинде баскетбол майдан да къураллыкъды. Ол 4 минг квадрат метр чакълы  жерни аллыкъды, кеси да  уллу эришиуле бардырырча излемлеге келиширча жарашдырыллыкъды.  Муниципалитет а инвесторгъа инфраструктура жаны бла болушурукъду. 

Таймураз Ахохов билдиргеннге кёре,  «Кюн шахар» сабий чыгъармачы академияны къатында футбол майданнга да жол ишленирикди.  «Нальчикни футбол командасы битеуроссей эришиуледе саугъалы жерни алгъанды. Энди Нальчикде регионла аралы оюнла да бардырыллыкъдыла. Аны себепли футбол майданнга тынгылы жол болуру – оюнланы къурагъанланы баш излемлеринден бириди»,-деп къошханды ол.
Кластерни тийресинде  2023 жылгъа дагъыда  регби ойнарча майдан да ишлерге белгиленеди.  Жети минг квадрат метрни тутарыкъ объект кластерге регбиден республикалы команданы тилеги бла киргизтилгенди.  Бизни регбичилерибиз россейли эришиулеге къатышадыла, алчы жерлеге да чыгъадыла, аны себепли алагъа жараула этерге тынгылы жер керек болуп турады.
 2023 жылда сабийле спорт бла кюреширча, эрикгенлерин да кетерирча «Тритон» араны, аттракционла, спорт эмда концерт майданчыкъла бла сабий паркны да  къурулушларын башларгъа  белгиленеди.  Казбек Коков  сабий-жаш тёлю спорт кластер республиканы ара шахарын айнытыуну чеклеринде Нальчикде, Вольный Ауурлда да кёп фатарлы юйледе жашагъанла социал объектле бла хайырланыр ючюн къуралгъанын чертгенди эмда бара-баргъан заманда  «Восточный» микрорайонну да айнытыргъа белгиленнгенин айтханды.
 Нальчикде энди къураллыкъ спорт кластерни презентациясы республиканы баш архитекторларыны къатышыулары бла ётгенди. Аны кезиуюнде сёз республиканы ара шахарыны уллу орамларын, ол санда Ленин проспектни,  жангыртыуну бла тапландырыуну юсюнден да баргъанды. Казбек Коковну айтханы бла КъМР-ни Архитекторларыны союзу шахарны архитектура сыфатын тюрлендириуню юсюнден оюмларын хазырларыкъдыла. Алагъа шахарны советинде къараллыкъды. Республиканы Башчысы  шахарчыланы оюмларын да сорургъа кереклисин эсгертгенди.  Андан сора да, 2-чи Тамань дивизия атлы орамдагъы жолгъа тынгылы ремонт этиуню, Буз къаланы, кластерни башха спорт объектлерини тийрелеринде жолланы къурулушлары бла байламлы  жумушланы тынгылы сюзерге буюргъанды.