Ачыгъанланы саны иги да азайтылгъанды

КъМР-де МВД-ны Жолда жюрюуню къоркъуусузлугъу жаны бла къырал инспекцияны управлениясында жылны аллындан бери озгъан юч айны ичинде тамамлагъан жумушланы эсеплери чыгъарылгъандыла.  Кенгешге  КъМР-де МВД-ны жамауат къоркъуусузлукъну сакълау жаны бла полицияны таматасыны орунбасары Роберт Керефов, УГИБДД-ны бёлюмлерини башчылары да къатышхандыла. Аны юсюнден бизге ведомствону пресс-службасындан билдиргендиле.

Управленияны таматасы полицияны подполковниги Роберт Яльмеев озгъан юч айда инспекторла тамамлгъан жумушланы юслеринден билдиргенди эмда келир кезиуге борчла салгъанды.

Ол белгили этген шартлагъа кёре, бу кезиуде республикада жол-транспорт болумла 21 процентге азайгъандыла, алада жоюлгъанла 18,5 процентге, жаралы болгъанла уа 11 процентге аз болгъанларын да чертгенди ол.

 Аварияланы профилактикасы жаны бла  жумушланы сюзе, кенгешге къатышханла Бахсан, Урван эм Прохладна районлада жолда болум алгъынча къыйынлай къалгъанын билдиргендиле. Алада УГИБДД-ны бёлюмлерини таматалары аны сылтауларыны юслеринден докладла этгендиле.

«Кавказ» федерал жолда, Нальчикде эм Элбрус районда жол-транспорт болумла азайтылгъанлары да белгили этилгенди.

Роберт Керефов да сёлешгенди кенгешде. Ол эмда УГИБДД-ны оноучусу Роберт Яльмеев жолда сабийлени бла жаяу адамланы къоркъуусузлукъларын сакълау, жорукълагъа ауур бузукълукъланы азайтыу, профилактика  жаны бла борчла салгъандыла.