Иши, къылыгъы бла да атын иги бла айтдыра

Медицинада жетишимле болдургъан  жаш специалистлени атлары айтылса, не букъдурлугъу барды, бек хычыуун кёрюнеди.    Краснодар   крайда  Новотитаровский районда  1-чи номерли больницада   тишлеге  бакъгъан врач- хирург болуп ишлеген  Рахайланы Юсюпню къызы Ренатаны юсюнден билгенимде да,  ёхтемлик сезимле туугъандыла.

Ол  Къабарты-Малкъар къырал университетни  медицина факультетин бек иги белгилеге   бошап, эки жылны  Ставропольда  ординатурада окъугъанды. Аны бла бирге уа спорт бла да къаты кюрешгенди. Ол сууда жюзюуню, стол теннисни  бютюн бек жаратханды, музыкалы школда уа инструментледе согъаргъа, жырларгъа да юйреннгенди.

Окъугъан,  ишлеп башлагъан заманында да  Ренатаны насыбы тутхан эди. Аны жолунда  фахмулу, сынаулу, ахшы адамла тюбегендиле.  Ол  Къабарты-Малкъарда бек иги  хирургга саналгъан, РФ-ни  илмусуну сыйлы къуллукъчусу  Мызыланы Исмайылны,   профессор Николай бла аны  къарындашы Сергей Гаражаловланы,  Нальчикде  республикалы стоматология арада  хирург-стоматолог  Хаджимурат Кочесоковну уллу жюрек ыразылыкъ бла сагъынады, аланы  махтауларына да тийишли болгъаны бла ёхтемленеди.  
Краснодаргъа уа Ренатаны жууукълары  чакъырадыла. Шахарны, Къобанны да  къыз бир кёргенлей жаратханды.

-Тенгиз, таула, къыйыры-чеги болмагъан тирликли сабанла, не заманда да болушлукъ этерге хазыр болгъан  огъурлу  адамла - барысы да мени жюрегиме балхам кибик  жагъылгъандыла. Ма аны ючюн къалгъанма  анда, - деп хапарлайды Рената.

Къайсы ишни да барды тынчы, къыйыны да. Алай усталыгъынгы сюйсенг,   къыйынлыкъла кёзге кёрюнмейдиле. Ауруп, поликлиникагъа келалмагъан къартланы, къарыусузланы юйлерине Рената  кесини машинасы бла  барып, аз кере болушлукъ этмегенди.  

- Мен ишими  бек сюеме. Аны себепли усталыгъымы ёсдюрюрге къуруда къайгъырама: мастер-класслагъа барама, медицина литератураны окъуйма, тишлеге диагностика этиуню эмда  багъыуну,  аланы  терк эмда къоркъуусуз   алыуну  шёндюгюлю амаллары бла шагъырейленеме,-дейди  Рахайланы къыз.

Аны эки усталыгъы барды: тишлеге бакъгъан  терапевт эмда хирург.    Бир жол а  ЛОР врачны ишин да тамамларгъа тюшгенди. Бир гитче жашчыкъны бурунундан карандашны чыгъаргъанды. Ол тургъан элде  кёпле келедиле анга болушлукъ тилеп.  Тишлеге къарагъаны бла чекленип къалмай, башха  ауруула бла келгенлеге  да багъаргъа  тюшеди.  Чынтты врач хар нени да билирге керекди, деп оюмлайды Рената. Ма аны ол  аллай ышанлары ючюн табады ол башхаладан хурмет, сый-намыс да.