Донбассдан сабийлени жокълагъандыла

 РФ-ни Президентини СКФО-да толу эркинликли келечиси Юрий Чайка Къабарты-Малкъаргъа иш бла келген кезиде  «Радуга» реабилитация арада Донецк халкъ республикадан келген сабийлени жокълагъанды. КъМР-ни Башчысы Казбек Коков бла  бирге полпред гитче къонакъла къалай тургъанларына къарагъанды, «Радуганы» специалистлери бла да ушакъ этгенди. 

 Мында Макеевка шахардан келген 35 сабийге медицина эмда социал-психология болушлукъ тапдырылады. Аны бла да къалмай, эрикмезча мадарла да этиледиле, Къабарты-Малкъарны ариу жерлерине жолоучулукъла къураладыла. Бек башы уа – сабийле окъууларындан айырылмайдыла, битеулю билим бериу программалагъа кёре дерсле аладыла.

Сыйлы къонакъла сабий реабилитация араны ырысхы-техника болумлары бла да шагъырейленнгендиле, аны игилендириу амалларын да сюзгендиле. Юрий Чайка сабийле ойнарча тогъуз отоуну бла компьютер кабинетни керекли оборудование бла жалчытыугъа себеплик этерге хазыр болгъанын айтханды. Сабийле бла ушакъ этген кезиуде, къырал башчыны келечиси аладан, аланы биргелерине келген педагогладан Къабарты-Малкъарда тургъанларын жаратханларын бла къалгъанларын да соргъанды. Ала мында жашагъанла огъурлу къонакъбайла болгъанларын белгилегендиле, арада ишлегенлеге да алагъа къайгъыргъанлары, хар жаны бла себеплик этгенлери ючюн жюрек ыразылыкъларын билдиргендиле. 

Сабийле дагъыда Юрий Чайкагъа спортда жетишимлери бла да махтаннгандыла: аланы бир къаууму художественная гимнастика, акробатика эмда картинг бла кюрешедиле.  «Радугада» уа ала Донбассда къазауат баргъаны бла байламлы тохтатхан жарауларын жангыдан башлагъандыла.

Тюбешиуню ахарында сабийлеге татлы ашарыкъла бла эсде къаллыкъ саугъала берилгендиле.