Энергетикле билимлерин бла хунерликлерин сынап кёргендиле

«Россети Шимал Кавказ» компанияны Къабарты-Малкъарда бёлюмюнде оператив ишчини Кюнюн бардыргъандыла. Анга районлада эмда шахарлада электросетьлени, подстанцияланы жумушларына къарагъан службаланы, къоркъуусузлукъну жалчытхан эмда токну чыгъарыугъа контроль этген бёлюмлени келечилери къатышхандыла.

Келир кюз эмда къыш кезиуледе ишни тынгылы бардырыргъа хазыр болурча компанияда аслам жумуш тындырыргъа керекди. Бу кюн а специалистле жыйылып, усталыкъларын эм билимлерин сынап кёредиле, ишни эте билгенлерин ачыкълайдыла. Юйретиулени чеклеринде энергетикле ток ёчюлюп къалса не зат этерге кереклисин, электрокюч оборудованияны ишин жалчытыу жорукъланы къалай билгенлерин да кёргюзтгендиле. Дагъыда норматив-техникалы документацияны излемлерини юслеринден да хапарлагъандыла.

Компанияны республикада бёлюмюню баш инженерини орунбасары Марина Василенко быллай жыйылыулагъа уллу магъана береди. Ол ишде къоркъуусузлукъ да, хайырланыучуланы да электрокюч бла жалчытыу да бек изленнгенин чертгенди. «Оператив-диспетчер къауумланы келечилери энергетиклени бла тышындан адамланы араларында байламлыкъла къурайдыла. Подстанциялада, саулай сетьледе да чурумла чыкъсала, аланы кетериуге кёз-къулакъ болгъанла да ма аладыла», - дегенди.