Келир къышны къайгъысын бюгюнлюкде этедиле

«Россети Шимал Кавказ» компания кесини быйыл биринчи кварталгъа белгилеген ремонт программасын кёп къалмай эки кереге артыгъы  бла толтургъанды. Аны Къабарты-Малкъарда бёлюмюнде айтханларына кёре, жангыртыу ишле регионну электросетевой комплексин келир кюз артына эмда къыш кезиуге тынгылы хазырларча тамамланнгандыла.

Алай бла битеу да Шимал Кавказда юч айны ичинде 305 миллион сом багъасына мадар этилгенди. Айтылгъаныча, бу программа артыгъы бла бизни республикада, Къарачай-Черкесде, Ставрополь крайда, Чеченде, Ингушетияда, Дагъыстанда тамамланнганды. Аны чеклеринде энергетикле кёп къалмай жюз километр ток ызланы жангыртхандыла, талай подстанциялада оборудованиягъа ремонт этгендиле, ол санда 139 коммутация аппаратны да жангыртхандыла.

Быллай ишлени чеклеринде асламысында подстанциялагъа уллуракъ эс бурулады. Компанияны башчысыны орунбасары – тамата инженери Виктор Абаимов айтханнга кёре, ремонт программаны баш мураты не заманда да бирди – электросетевой комплексни тынгылы эмда ышаннгылы ишлерча этиу. Аны себепли быллай жумушлагъа энчи контроль бардырылады. Бу жолгъу ишле да тынгылы, графикден кеч къалмай тамамланнгандыла. Саулай алып айтханда, компания СКФО-да энергетика объектлени быйыл жангыртыугъа 3,3 миллиард сом къоратыргъа умутлуду.