Болушлукъ, жюрек жылыулукъ да табадыла

Бюгюнлюкде къошакъ халда болушлукъ излегенлеге, ол санда юйлеринде къаралгъанлагъа, энчи амал табаргъа керекди. Бу жаны бла Элбрус районда Социал болушлукъ берген Ара  жетишимли ишлейди. Ол 1995 жылда къуралгъанды. Анда жыл санлары жетгенлеге, сакъатлагъа, кёп сабийли эмда къолайсыз  юйюрлеге  болушлукъ тапдырадыла.  

Биринчи жыл  махкемени  юч бёлюмю болгъанды, бусагъатда уа аланы саны жетиге жетеди. Алада ишлегенле  Тырныаууз шахарда эмда районну эллеринде жашагъанлагъа къарайдыла. Бусагъатда эсепде  саулай да 288 адам турадыла. Аладан 178 элледе жашайдыла.

Социал ишчилеге кёп тюрлю жумушну тамамларгъа тюшеди. Ол санда медицина эмда психология жаны бла болушлукъ да бериледи. Дагъыда аланы борчларына жылы аш бла жалчытыу, продуктла, юс эмда аякъ кийимле эм башха бек  керекли  затла тапдырыу да киреди.

Былтыр аллай болушлукъну  695 адам алгъанды. Спонсорланы эмда Араны ишчилерини  хатерлери  бла къолайсыз юйюрлеге 46860 сомгъа  185  аш-азыкъ хуржун юлешиннгенди. Араны келечилери пенсиячыланы, сакъатланы юйлерине барып, кереклерин билгенлей туруучудула.

 Комплексде кюндюз туруп,  солургъа, саулукъларын игилендирирге сюйгенле да кёпдюле. Бёлюмге тынгылы ремонт этилгенден бери ол айбатланнганды эмда ишлерге да тынчыракъ  болгъанды. Мында кюннге юч кере ашатадыла, профилактика халда саулукъгъа багъадыла, экскурсияла, районну артистлери къатышып концертле   бардырыладыла, жаш тёлю бла тюбешиуле эмда башха акцияла ётедиле.

Юйюрге бла сабийге психология-педагогика жаны бла болушлукъ берген бёлюм а   бюгюнлюкде  340 адамгъа болушады. Аладан 237-си акъылбалыкъ болмагъанладыла. Дагъыда 87 юйюрде социал жаны бла болумгъа кёз-къулакъ болгъанлай турадыла.
Сабийле кеслери алларына  бошуна айланмазча, аманлыкъчылыкъ этмезча эмда  бир тюрлю хатагъа тюшмезча профилактика мадарла   бардырыладыла. Былтыр  онтёрт юйюр бла  тюбешиуле  ётгендиле.  Бюгюнлюкде аладан  онбири тюзелгендиле.

Социал эм башха  жаны бла  болушхан бёлюм да ишин жетишимли бардырады.  Мында эсепде тургъанлагъа учуз багъа бла  чачларын къыркъдырыргъа, кийимлерин тикдирирге онг бериледи. Былтыр бёлюм  3873 адамгъа къарагъанды.  Юридический жаны бла  болушлукъну  уа къурау-методика бёлюмде алыргъа боллукъду.  

Тынгылы  социал болушлукъ берирге бирде къолай жетмей къалады.  Ол себепден  предпринимательлени эмда башхаланы да къошумчулукълары бек жарайды. Бусагъатда социал араны магъанасы болмагъанча уллулай къалады. Былтыр ары тюрлю-тюрлю жумушлары бла 4786  адам келген эди. Ол а Элбрус районда жашагъанланы жетиден бириди.