Экономикагъа себеплик этиуню амаллары сюзюлгендиле

КъМР-ни Правительствосуну Председатели Мусукланы Алий эм КъМР-ни экономика айнытыу министри Рахайланы Борис видеоконференция халда РФ-ни Къырал советини экономика соруула эм жангы коронавирус жукъгъан аурууну жайылыууна къажау ишчи къауумну жыйылыууна къошулгъандыла. Аны ишчи къауумну таматасы Сергей Собянин эм РФ-ни Правительствосуну биринчи вице-премьери Андрей Белоусов бардыргъандыла. Аны юсюнден КъМР-ни Экономиканы айнытыу министерствосундан билдиргендиле.

Анда тышындан санкцияла басынчакълыкъ этген болумлада экономикагъа билеклик этиу, магъаналы предприятиялагъа льготалы кредитле, саулукъ сакълау системаны дарманла эм медицина керекле бла жалчытыу соруула сюзюлгендиле. Къабарты-Малкъар Республиканы Правительствосу, экономика эм социал болумлагъа, жарсыулу соруулагъа эм аланы тамамлау оюмлагъа эс бургъанлай турурча, гитче эм орта бизнесни предприятиялары бла байламлыкъла тутадыла.

Промышленный бёлюмде иш бардыргъан магъаналы предприятияланы федерал тизмесине АО «Терекалмаз» къошулгъанды. НКО «КъМР-ни гарантиялы фонду» регион гарантиялы организация быйылны аллындан бери МСП-ны субъектлерине битеу да бирге 57,8 миллион сомгъа 7 поручительство бергенди, Гарантиялы фондну поручительлиги  бла кредит келишимлени ёлчеми 150,5 миллион сом болгъанды.

Быйылны аллындан бери «Къабарты-Малкъар Республиканы МСП субъектлерини микрокредитованиясыны фонду» битеу да бирге 20,13 миллион сомгъа 34 займ бергенди. Республиканы кредит-финанс организациялары «Корпорация МСП» АО-ну программаларына кёре 14,6 миллион сомгъа 11 заявканы къабыл кёргендиле, РФ-ни Минсельхозуну программаларына кёре  битеу да бирге 307,77 миллион сомгъа 9 заявка къабыл кёрюлгенди, «Оборотное кредитование» программагъа кёре Россей ЦБ 1000 миллион сомгъа 1 заявканы къабыл кёргенди.
 
МСП Банкны регионда менеджерини къарауунда «Корпорация МСП» АО-ну программаларыны чеклеринде оборотный ырысхыны толтурурча льготалы кредитлеге МСП-ны субъектлеринден битеу да бирге 119,5 миллион сомгъа 11 заявка барды.

КъМР-ни Минпромэнерготоргу республиканы товар къыстырыкъларына къарагъанлай турады, Къабарты-Малкъарда жашагъанланы сурамларын толтурур ючюн товар къыстырыкъла жетиширча салынадыла (ассортиментге кёре: розница сатыу-алыуда 2-ден 80 кюннге дери, оптовыйде 5-ден 38 кюннге дери).
Регионланы губернаторларына бла башчыларына тийишли буйрукъла бла эсгертиуле этилгендиле.