Токну урлагъан артда бютюн кёп тёлер

Электрокючню аны ючюн тёлемей хайырланыргъа сюйгенледен быйыл 60 минг сом жыйылгъанды. Кёп фатарлы юйледе бардырылгъан тийишли рейдлени кезиуюнде токну урлау бла байламлы 43 шарт тохташдырылгъанды. Ол 56 минг киловатт-сагъат болады, аны багъасы уа 189 минг сомгъа жетеди, деп билдиргендиле «Каббалкэнерго» компаниядан.

«Уручулукъну арталлыда къурутурча жаланда энергетиклени къармашыулары  азды. Бу ишге коммунальщикле эмда право низамны къоруулаучу органланы келечилери да къатышыргъа керекдиле», - дегенди компанияны башчыларындан бири Аслан Докшукин.

Ол айтханнга кёре, кёп къатлы журтлада жашагъанланы ичинде токну биреулен урлай эсе, аны багъасын анда тургъанланы барысына да тёлерге тюшеди. Сёз ол юйде жашагъанланы барысы хайырланнган ырысхыны юсюнден барады. Андан сора да, ток бла жалчытыуну качествосу да осалына кетеди. Ол а бирде юй жумушлагъа керекли приборланы окъуна кюйдюрюрге боллукъду.

Токну урлагъан адам, эртте-кеч болса да, тутулмай къалмайды. Анга салынырыкъ тазир а ол аягъан тёлеуден иги да кёп боллукъду, деп эсгертгендиле энергетика компаниядан.