Къууанчлы халда ачылгъанды

Школчуланы ОБЖ-дан онбиринчи  битеуроссей олимпиадаларыны ахыр уруму Нальчикде башланнганды. Къыралны онсегиз шахарындан эм кючлю къауумла КъМКъУ-ну спорт майданларында бла «Кюн шахар» сабий чыгъармачылыкъ академияда апрельни  22-ден 25-сине дери билимлерин ачыкъларыкъдыла.

Къабарты-Малкъаргъа РФ-ни 62 регионундан 191 адам келгенди. Москва, Санкт-Петербург шахарла, Архангельск, Волгоград эмда Иркутск областьла, Красноярский край, Чюйютлюлени Автоном округу, Шимал Кавказны республикалары, къыралыбызны бирси жерлери да бизге сагъынылгъан дисциплинадан кеслеринде эм ахшы кёрюмдюлеге жетген окъуучуларын жибергендиле. Эришиуню  ачылыуу бла аланы

КъМР-ни Парламентини председателини орунбасары Жанатайланы Салим, жарыкъландырыу, илму эмда жаш тёлюню ишлери жаны бла министри Ауес Кумыков, Башчысыны кенгешчиси, олимпиаданы къурау комитетини келечиси Нина Емузова, КъМКъУ-ну ректору Юрий Альтудов, «Къоркъуусузлукъну школу» Битеуроссей сабий-жаш тёлю жамауат къымылдауну таматасы Надежда Ершова, жюрини председатели, къонакъбай, вузну Педагогика, психология эмда физкультура-спорт билим бериу институтуну профессору Ахмед Маламатов алгъышлагъандыла. Андан сора да, РФ-ни жарыкъландырыу министри Ольга Васильеваны сабийлеге жоралагъан сёзлери  эшитилгендиле.

Эришиуню баш мураты къоркъуусузлукъда жашау этиуню культурасын, къыйын болумланы алгъадан да эслей билиуню  айнытыуду эмда адамгъа кесин къорууларгъа, сакъларгъа юйретиудю. Олимпиадагъа къатыша, школчула жаланда ОБЖ-дан теория жаны бла ангылауларын ачыкълап къоймай, къалайда да къоркъуусузлукъну жалчыта билгенлерин кёргюзтедиле.

Бери келген биринчи кюнлеринден окъуна  къонакъла республикабызны ариу жерлеринде болургъа онг табарыкъдыла. Бараз кюн практика эмда теория жаны бла конкурсла башланырыкъдыла. Байрым кюн а университетде А.Сокуров атлы чыгъармачы мастерскойну залында эсеплени чыгъарыугъа аталгъан ингир боллукъду.