Тириликни тас этмей ишлер умутлудула

Федерал таможня службаны билдириуюне кёре, былтыр Къабарты-Малкъардан тыш къыраллагъа 17,3 миллион доллар багъасына эл мюлк продукция жиберилгенди. Аны бла республика «Халкъла аралы эм экспорт» миллет проектни чеклеринде борчун 15,3 процентге артыгъы бла толтургъанды.

Тышына мирзеу, татлы ашарыкъла, бишлакъ, чагъыр эмда татлы суула, нартюх крахмал, мал ашла, къыйма эмда этден жарашдырылгъан ашарыкъла, тахта кёгетле эмда консервала жиберилгендиле. Алыучула уа Гюржюден, Узбекистандан, Турциядан, Азербайджандан, Армениядан, Къыргъызстандан, Белоруссиядан, Таджикистандан, Къазахстандан, Туркмениядан, Молдавиядан, Юг Осетиядан, Израильден, Монголиядан эм Ганадандыла.

- Мындан арысында да ол тириликни тас этмей ишлерге умутлубуз. Республиканы аграрчылары уа продукцияны тюрлюлерин эмда ёлчемин кёбейтирге, башха къыралла бла да байламлыкъла къураргъа хазырдыла. Сагъынылгъан миллет проектни чеклеринде быйылгъы борчубуз – 18 миллион доллар багъасына продукция сатаргъады. Аны толтурургъа онгларыбыз бардыла, къолубуздан да келликди, - деп белгилегенди КъМР-ни эл мюлк министри Хасан Сижажев.