Бал туз, башха затла да жетерча бардыла

РФ-ни промышленность эм сатыу-алыу министрини орунбасары Виктор Евтухов «Объясняем.рф» порталда социал жаны бла магъаналы товарланы рыногунда болумну юсюнден хапарлагъанды. Бюгюнлюкде бал туздан бизни къыралда къытлыкъ жокъду, деп ышандыргъанды ол эмда жууукъ кюнледе окъуна анга сурам азайырыгъын белгилегенди.

«Ачыкъ айтханда,  Россейде бал туз бла бир тюрлю чурум жокъду, заводларыбыз аны неллай бир керек эсе да чыгъарадыла. Бу продукцияны башха къыраллагъа чыгъарыргъа чек салыннганын, тышындан бизге келтирирге уа чурум болмагъанын эсге алсакъ, аны бла жалчытыугъа жукъ да боллукъ тюйюлдю», - деп чертгенди министрни орунбасары.

Анга эмда хант тузгъа сурам уллу болгъанын ол саудюгерчиледен эмда адамла гузаба этгенлеринден кёргенди.

Багъала кётюрюлгенине экинчилери къалай къошумчулукъ этгенлерини юсюнден КъМР-ни Башчысы Казбек Коков да айтхан эди. Ол да тюкенлеге чабышмазгъа чакъыргъанды, заводлада бал туздан бир тюрлю къытлыкъ болмагъанын чертгенди. «Адамла аны ангылап, гузаба этгенни къойсала, хар не да жерине къайтып, багъала да тюшерик эдиле», - деген эди ол.

Виктор Евтухов бизнесни сагъайтхан энтта да бир чурумну юсюнден сагъыннганды. Ол кассалада хайырланылгъан къагъыт бла байламлыды. Министрни орунбасары анга сурам толусунлай жалчытынырыгъын белгилегенди. Касса чек бермеген тюкенлеге уа ФНС тазир салыргъа боллугъун туура этгенди. 

Гражданла гигиена товарла, бытовой химия бла байламлы кёп соруу бередиле, ала бла жалчытыуда иш къалай боллугъун билирге сюедиле. Виктор Евтухов айтханнга кёре, аланы чыгъарыучулада сырьё энтта да бир ненча айгъа жетерча аллай бир барды, къытлыкъ болур амал жокъду. «Бытовой химияны уа биз артыгъы бла окъуна чыгъарабыз. Къытлыкъ болгъанны къой, хайырланып окъуна бошаяллыкъ тюйюлбюз», - дегенди ол.