Чирик кёлню тийресин тазалагъандыла

Озгъан шабат кюнде Бабугентни администрациясыны, Маданият юйюню келечилери эм устазла бла тамата классланы окъуучулары  Чирик кёлню тийресин къаты къалгъан-къулгъанладан бла кир-кипчикден тазалагъандыла.

Белгилисича, Чирик кёлле туристле аслам келирге сюйген  республиканы табийгъат тамашаларындан бирлеридиле. Ол себепден  жыл сайын жаз башында бла къыркъарда аны жагъаларында  санитар болумну игилендирирча  субботник  бардырылады. 

Жарсыугъа, къонакъланы бир къаууму  экологиягъа заран салырбыз, табийгъатны ариу сыфатын бузарбыз деп къайгъырмай,  кеслеринден сора  пластик, мияла шешаланы,  пакетлени эм башха затланы да  атып кетедиле.   Бабугентчиле   бирсилени оюмсузлукълары ючюн кеслери уялыргъа тюшериклерин сезип, бирлешип,  кюн жылылада  магъаналы ишге чыкъгъандыла. Ол кюн тёгерек-башдан иги кесек багуш жыйылгъанды. Аны «Экологистика» биригиуню энчи техникасы бла тышына элтип тёкгендиле.   

Бабугент элни администрациясы жамауатны эсине салады!

Чирик кёлню тийресинде кир-кипчикни атарча орунла эм контейнерле да бардыла.  Аш-суудан къалгъан аберилени алагъа атаргъа  къыйын тюйюлдю. Адам бирсилени  да сагъышын этерге, табийгъатны бетин бузмазгъа, заран салмазгъа тийишлиди.