Жаш тёлю кинофестивальгъа заявкаланы алыу ахырына жетгенди

Жаш тёлюню «Кинокавказ» деген ючюнчю ачыкъ Шимал-Кавказ кинофестивалына къатышырча заявкаланы алыу ахырына жетгенди. Бусагъатда  заявкаланы сайлау бардырылады, шорт-лист  кинофестивальны сайтында www.kinokavkaz.ru  2022 жылда апрельде басмаланырыкъды.

Тюбешиу, аны къураучусу уа СКФО-да жангыз чыгъармачылыкъ вуз – Искусстволаны Шимал-Кавказ къырал институтуду, тёгерекдеги болумгъа кёре 2022 жылда 18-20 майда Нальчикде очный халда бардырыллыкъды.

Проектни даражасы да ёсе баргъаны сёзсюздю – алгъын ётген фестивальгъа 170 адам къатышхан эсе, бу жол а 16-35 жыллары толгъан кинематографистлени саны эки кере чакълы бирге кёбейгенди. Ала кеслерини  чыгъармачылыкъларыны эсеплерин  коллегаларына эм ВГИК-ни кино бла режиссура курсуну таматасы Виталий Калинин таматалыкъ этген бийик жюриге  кёргюзтюрге сюедиле.

«Къурау комитетге 360-дан аслам заявка келгенди, - деп билдиргенди проектни башчысы Артём Челикин. – Номинацияла бла байламлы алып къарагъанда: «Эм иги къысхаметражлы анимациялы фильм» - 25 заявка, «Эм иги къысхаметражлы оюн фильм» - 194, «Эм иги социальный ролик» - 60, «Эм иги телевидение документли фильм» - 82».

Фестивальгъа къатышыргъа сюйгенлерин билдиргенлени араларында узакъ эм жууукъ тыш къыралладан, РФ-ни регионларындан эм шахарларындан, СКФО-ну регионларындан адамла бардыла.