Агропромышленность комплекс тийишлисича ишлейди

Россейни Эл мюлк министерствосу АПК-да производствону айнытыу бла бек тири кюрешеди. Ведомствода айтханларыча, ол импортну алышындырыу программаны толтурургъа себеплик этерге керекди.

Эл мюлк бёлюм тири къармашыудады. Продукцияны экспортха ташыу жаны бла да иги хайыр кёргюзтеди. Эт чыгъарыучуланы миллет биригиуюню башчысы Сергей Юшин билдиргеннге кёре, бизни къыралда быллай продукцияны рыногунда болум тапды. Арт жыйырма жылны ичинде Россей эм уллу импортёрдан кетип, сау дунияда этни кёп тюрлюлери бла аслам халда жалчытхан къыралланы санына къошулгъанды.

Тахта кёгетлени рыногунда да болум осал тюйюлдю. Аланы бир-бирлерини багъалары кётюрюлгенини сылтауун экспертле жылны кезиую бла байламлы этедиле. «Ол да продукцияны сакълаугъа этилген къоранчла ючюндю алай. Дагъыда жаз башы жетгинчи аны бир кесеги да бузулады. Тыш къыралладан келтирилген продукцияны багъасы уа бютюнда уллу болгъанды. Жангы тирлик жетгени бла хар не да тохташырыкъды», - дегенди Тахта кёгетчилени бла жемишчилени миллет союзуну башчысы Михаил Глушков.

Ол айтханнга кёре, санкцияла кийирилгенликге, Россей тахта кёгетлеге излемин СНГ-да къыралладан ташып да жабарыкъды. «Эсге салайым, 2014 жылдан башлап биз Европадан бир тюрлю кёгет сатып алмайбыз. Иш алай болгъанын бир киши да сезмейди. Египетге, Израильге, Тюркге, Узбекистаннга, Таджикистаннга уа жол алгъынча ачыкъды», - деп къошханды ол.

Къабарты-Малкъарда да эл мюлк продукцияны чыгъарыу ёсе барады. Республиканы эл мюлк министри Хасан Сижажев билдиргенича, былтыр 68,8 миллиард сом багъасына продукция жарашдырылгъанды. Буруннгу жыл бла тенглешдиргенде ёсюм он процентге жетгенди. «Бюгюннге баш борчубуз – халкъны аш-азыкъла бла толусунлай жалчытыуду. Аны бла бирге социал жаны бла магъаналы продукциядан иги къыстырыкъ этиуге, импортну алышындырыугъа энчи эс буруллукъду. Эл мюлк товарла чыгъарыучулагъа къырал да иги болушады; быйыл бу сферагъа 2,38 миллиард сом жиберилликди», - деп чертгенди министр.

КъМР-ни Башчысы Казбек Коковну буйругъу бла регионда АПК-ны, промышленностьну, сатыу-алыуну эмда башха сфераланы ишлерин ышаннгылы бардырыу жаны бла оператив штаб къуралгъанды.