Уллу магъанасы болгъан хазна

22 март - Суу байлыкъланы битеудуния кюню

Жыл сайын 22 мартда Суу байлыкъланы Битеудуния кюню белгиленеди. Аны ООН-ну Генеральный  Ассамблеясы 1993 жылда къурагъанды. Бу кюн битеу къыралла да суу байлыкъланы сакълаугъа эмда хайырланыугъа жораланнган жумушланы тамамларгъа чакъырадыла.

Быйылгъы байрам жер тюбюндеги  суулагъа аталады. Кёзге кёрюнмегенликге, аланы магъанасы айтып - айтмазча  уллуду. Быллай суула топуракъны, юзмезлени ичлеринде табыладыла, жер башына чыгъып, шауданланы, кёллени, череклени толтурадыла, тенгизлеге да жетедиле. Жер тюбюне уа жауунладан, къар эригенден сора ётедиле. Суусуз жер башында жашау боллукъ тюйюлдю, жер тююнден  суусуз да алайды. Къургъакълыкъ къысхан районлада андан бек уллу къытлыкъ болады.

Биз аллай сууланы ичебиз, аш этгенде неда производствода да аланы  хайырланабыз. Аласыз кёп экосистемала да къуруп кетерикдиле. Алгъаракълада COVID-19 ауруу жайылгъаны таза сууну, санитарияны магъаналылыгъын толу ачыкълагъанды.

Сууну аяусуз хайырланыргъа, бошуна тёгюп турургъа да жарамайды. Ол кёп кёрюннгенликге, химия неда башха затла бла кирленнген сууну тазалагъан бек къыйынды, бирде уа алай этип кюрешгенден хайыр да чыкъмайды. Аны себепли бу байлыкъгъа аяулу кёзден къараргъа, ёсе келген тёлюлени да алай юйретирге тийишлиди.

Кюнню халы тюрлене баргъан кезиуде жер тюбюнде сууланы тинтиу, сакълау эмда хайырланыу энчи магъананы тутады. Адам саны кёбейе баргъанын эсге алсакъ, ол бизни анга излемибизни да жалчытыргъа керекди.