Россейни Жигити кадетледе къонакъда

Кёп болмай Бабугентде Деппуланы Хакимни атын жюрютген 2-чи номерли кадет школ-интернатда къонакъда Россейни Жигити Евгений Бобров, Къоруулау министерствону экспедиция-излем бёлюмюню таматасыны орунбасары Александр Агеев эм запасдагъы офицерлени "Мегапир" миллет ассоциацияларыны КъМР-де биригиуюню башчысы Атайланы Жашарбек болгъандыла.  

Евгений Бобров подводник-гидронавтды, сууну теренинде жюзген техниканы сынаучусуду, Орус география биригиуню суу тюбюнде тинтиуле бардыргъан арасыны экспедиция-излем бёлюмюню таматасыды, отставкадагъы 1-чи ранглы капитанды, ВМФ-ни аскерини санында Кишиликни юч орденини да биринчи кавалериди.

2013 жылда 6 декабрьде энчи борчну толтурууда кишилигин кёргюзтгени ючюн Россей Федерацияны Жигити деген атха тийишли болуп, Алтын Жулдуз бла саугъаланнганды.   
Жаш тёлю бла тюбешиу хайырлы ётгенди. Кадетле Евгений Алексеевичге кёп тюрлю соруула бергендиле, ол а алагъа толу жууапларгъа кюрешгенди.  Ол санда иши бла байламлы кёп сейир шартла да келтиргенди.

Александр Агеев а «Хорламны кемелери – кемелени хорламлары» деген суратлау фильмни кёргюзтгенди. Анда суу тюбюнде бардырылгъан тинтиулени юсюнден билдирилгенди. Анга къарагъанларындан сора, жаш адамланы соруулары бютюн кёбейгендиле.
 
Белгили адамла бла тюбешиуле кадет школда терк-терк ётедиле. Бу жолгъу къонакъбайлыкъда аланы эслеринде къаллыгъы баямды. Жигитлени бирикдирген шартлагъа жарыкъ кёллюлюклерин, тутхан ишлерине кертичиликлерин, Ата журтларына сюймекликлерин, кемчиликсиз борчларын толтурууну эм башхаланы айтыргъа боллукъду.   
 
Ахырында кадет школ-интернатны таматасы Эристауланы Абдурахман педагогланы атларындан сейир тюбешиу ючюн къонакълагъа ыразылыгъын билдирип, саулукъ эм тутхан къыйын ишлеринде жангы жетишимле тежегенди.

Ызы бла, хар замандача, кадетле сыйлы къонакъла бла суратха тюшгендиле.