«Владимир Путин туура этген мадарлары бир да болмагъанча магъаналыдыла»

 КъМР-ни Башчысы Казбек Коков Россейни Президенти Владимир Путин бардыргъан селектор кенгешге къатышханды. Анда сёз Россей Федерацияны субъектлерине социал-экономика жаны бла тутхучлулукъ этиуню юсюнден баргъанды.

 Къырал башчы битеу дунияда бла къыралда тохташхан политика болумгъа багъа бичгенди, Украинаны демилитаризациялау эмда денацификациялау муратда Россей бардыргъан энчи аскер операция бла байламлы социал сфера бла экономика не халда болгъаныны юсюнден айтханды. Операцияны мураты  - Донецк эмда Луганск халкъ республикалагъа болушууду, Россейни къоркъуусузлугъун жалчытыуду деп, дагъыда бир кере чертгенди.

«Къабарты-Малкъар Республика толусунлай аны бардырыу жанлыды. Ол бек керек болгъанын эмда башха амал болмагъаны ючюн этилгенин ангылайбыз. Россейли халкъны тозуратыр, къыралыбызны гунч этер умутла бла бардырылгъан экономика урушну кезиуюнде кесибизни борчубузну да дурус билебиз», - деп жазгъанды Казбек Коков кенгешден сора кесини telegram-каналында.

 Россейни Президенти туура этген баш магъаналы оноуланы юслеринден кесини оюмун айта, Казбек Коков былай дегенди: «Быллай болумда халкъгъа, экономиканы бёлюмлерине, бизнесге, системаны къурагъан предприятиялагъа себеплик этиуню Владимир Владимирович бюгюн туура этген мадарлары бир да болмагъанча магъаналыдыла. Аланы жюз процентге толтуруу бизни баш борчубузду. Къырал башчы иш хакъны бек аз ёлчемин, жашау этерге жетерик ахчаны ёлчемин, бюджетниклени айлыкъларын, битеу социал тёлеулени да кётюрюуню юсюнден къаллай оноула этилгенлерин да  айтханды. Сабийлери болгъан  юйюрлеге, ишсиз къалгъанлагъа да тутхучлулукъ этиуню мадарлары этилликдиле. Къырал кереклени алыуну женгиллетирик, предпринимательликни айнытыугъа, производствону бла къурулушну ёлчемлерин кёбетиуге себеплик этерик законодательный актланы къауумуна тюзетиуле кийириледиле».

«Бюгюн Россейни Президенти Россей Федерацияда социал-экономика тутхучлулукъну сакълау эмда халкъын къоруулау жаны бла мадарланы юсюнден указгъа къол салгъанды. Документ регионланы полномочияларын иги да кенгертеди, география болумну, шёндюгю излемлени, субъектде экономика халны эсге алыу бла оноула этерге онг береди. Ол указ регион властьлагъа ышаныулукъ болгъанын кёргюзтгени бла бирге, Россейде къыралгъа оноу этиуню  кёп жылладан бери къурала келген кючлю системасы, бир законодательный база,  бир политика ниет  да болгъанларына шагъатлыкъ этеди. Ол россейли субъектлени, къыралны инсанларыны Президентибизни башчылыгъында бирикгенлерини белгисиди. Владимир Владимирович салгъан борчла барысы да толтуруллукъларына ишексизме», - деп чертгенди Казбек Коков.