Токну жорукъларына гитчеликден тюшюндюрюу

Электрокючню къоркъуусуз хайырланыуну жорукъларын ангылатыу ишни чеклеринде «МРСК СК» компанияны Къабарты-Малкъарда бёлюмюню специалистлери, тюрлю-тюрлю сабий учреждениялагъа барып, алада тийишли билдириуле этедиле, къоркъуусузлукъну дерслерин бардырадыла. Бу жол компанияны производстволу контроль этиу эм урунууну къоруулау службасыны келечилери Нальчикде «Тейри къылыч» санаторийде солугъан сабийлени жокълагъандыла, деп билдиргендиле бёлюмню пресс-службасындан.

Энергетикле бардыргъан дерсге кёп сабий къатышханды. Электрокюч адамны жашау болумун не жаны бла игилендиргенин билдиргенден сора, аны къоркъуулу кючюню юсюнден да айтхандыла къонакъла. Ишлей тургъан приборлагъа жууукълашмазгъа неда алагъа тиймезге, юзюлюп энишге тюшген темир чыбыкъланы къатларына бармазгъа, аллай тийреледе ойнамазгъа кереклисин да бек къаты эсгергендиле.

Быллай билдириуле этилгенден сора, сабийлени къоркъуулу жерлени кёргюзтген белгиле бла да шагъырейлендиргендиле. Токдан къоруулагъан керекле уа алагъа сейир кёрюннгендиле; электромонтёрну каскасын, энчи къол къапланы кёпле киерге сюйгендиле. Биринчи медицина болушлукъ "Гоша" деген манекенни юсюнде берилгенди. Хар айтылгъан, кёргюзтюлген затлагъа сабийле бек уллу эс бургъандыла, кеслери да кёп тюрлю соруула бергендиле.

Специалистле гитче тёлюге электрокючню аяуну, ол табийгъат байлыкъланы сакълауда къаллай уллу магъананы тутханыны юсюнден да билдиргендиле.

Санаторийни педагогика бёлюмюню башчысы Глашланы Зухура быллай дерслеге сабийле бек сюйюп къатышыучуларын белгилегенди. «Энергетикле бери келип, ангылатыу ишни тийишлисича бардыргъанлары ючюн ыразылыгъымы билдирирге сюеме. Дагъыда быллай дерсле сабийлеге артда энергетик усталыкъны сайларгъа себеплик этеригине да ишексизме», - дегенди ол.