Жолла мардалагъа келиширча

Къабарты-Малкъарда  муниципал магъаналы жолла мардалагъа келиширча 500 миллион дан аслам сом бёлюннгенди.  Ишле жылны ахырына дери бошалыргъа керекдиле. Аны юсюнден бизге КъМР-ни Транспорт эмда жол мюлк министерствосуну пресс-службасындан билдиргендиле.

Быйыл Нальчикде, Тырныауузда, Бызынгыда, Майскийде, Заречноеде,  Инаркойда,  Бахсанда,  Залукокоажеде, Исламейде, Герменчикде эм  Звёздныйде  жоллагъа тынгылы ремонт этилликди. Саулай ишле  жыйырма километрде бардырыллыкъдыла.  Майский шахарны ара орамында уа  ишлени кезиуюнде  чыпынлы чыракъланы да алышырыкъдыла.  

Нальчикни юсюнден энчи алып айтханда,  жолланы жангыртыугъа  бир миллиарддан аслам  сом къоратыллыкъды.  Ишле жылны ичинде тамамланырыкъдыла эм  жангы технологияла хайырланыллыкъдыла. Ахчаны асламысы  ток аз къоратхан чыпынлы чыракъланы алыргъа къоратыллыкъды.

Андан сора да, «Къоркъуусуз эмда качестволу жолла»  миллет проектге кёре, шахарны  жолларына комплекс халда  ремонт этилликди. Бу кюнледе ишле   Ленин, Къулий улу,  Шогенцуков атлы проспектлеге эм Къабарты орамда да барадыла.    

Аны бла бирге «Кавказ» Р-217 федерал трассада саулай 23 километр чакълы участокда  ремонт ишле башланырыкъдыла. Аны чеклеринде Ставрополь край бла  Куба-Табаны арасында сегиз километрлик жолну кенгертирикдиле.  Ол быйылны ахырына битерикди. Келир жылгъа уа  Аргудан бла Шимал Осетияны арасында 15 километр жерге тынгылы ремонт этилликди эм   кенгертилликди.

Жылны ахырына Куба-Табада, Элбрусда, Чегемде, Бахсанда,  Лескенде беш кёпюр ишленирикди, аладан ючюсю «Кавказ» федерал трассада  орналадыла.