Жаш инженерлени къыйматлы ишлери бла шагъырейленнгендиле

Кёп болмай Къабарты-Малкъар къырал университетде илму бла технологияланы декадасына жоралап  «Инженерча сагъыш эт» деген аты бла жаш инженерлени конкурсу болгъанды. Анга республиканы школчулары бла орта профессионал билим берген учрежденияланы студентлери къатышхандыла.

Жыйылыуну ача, КъМКъУ-ну илму-излем иш жаны бла проректоруну къуллугъун толтургъан Светлана Хаширова кючлерин сынаргъа келген жаш фахмуланы алгъышлагъанды.

- Университет жангы  кадрланы хазырлауда  эм илму иш бла кюрешгенлеге тутхучлукъ этиуге уллу  эс бурады. Бюгюн бери инженер усталыкъны сайлагъан  иги кесек жаш адам келгени бек къууандырады. Эришиулеге кеси жарашдыргъан робот бла  экинчи классны келечиси да къатышханы уа  бютюн асыу кёрюнеди.  Школчуланы арасында  быллай конкурс бизде биринчи кере ётеди. Хорлагъанла «Приоритет 2030» прогрмманы чеклеринде,   мындан арысында да,  проектлерин  вузну жаш тёлю лабораторияларында бардырыргъа онг табарыкъдыла,- дегенди Светлана Хаширова.

Ызы бла айтылгъан сёзлеге къошула, КъМКъУ-ну вузгъа дери хазырлау эм усталыкъ сайларгъа болушуу управленияны таматасы Артур Насипов  конкурсну магъанасы жаш адамланы хунерлерин ачыкъларгъа,   инженер-техника жаны бла башламчылыкъларында болушургъа эм байламлыкъ жюрютюрге  болгъанын билдиргенди. 

Быллай конкурсла бюгюнлюкде вузланы кёбюсюнде барадыла. Университетде робототехника, программирование, химия технологияла эм башха  усталыкъладан эришиуле да бола тургъандыла. Бу жол  а ол комплекс халда тюрлю-тюрлю усталыкъланы бирикдиреди. 

Конкурсантла тематикаларына кёре беш къауумгъа юлешиннгендиле: «Кавказны геоэкология жаны бла тинтиу», «Архитектура эм дизайн», «Адамны жашауунда жалгъан интеллект эм компьютер технологияла»,  «Анализ бардырыуда бюгюннгю амалла эм материалла», «Робототехника  системаланы къурау эм ишлетиу»  юлешиннгендиле.

 Бюгюнлюкде сабийле бла жаш адамланы техника  жаны бла чыгъармачылыкъгъа тартындырырча уллу эс бурулады.  Аны бла къырал органла, билим бериу организацияла, къошакъ билим берген арала, ата-анала да кюрешедиле.  Аны жетишимли бардырырча уа  жамауат экономика эм  культура жаны бла  аякъ юсюнде къаты турургъа керекди. 

Конкурсну къурагъанла мындан арысында быллай эришиулени   университетде  терк-терк ётдюрлюклерин айта, биринчи жерлени алгъанла илму  кураторланы болушлугъу бла  проектлерин вузну  лабораторияларында бардырлыкъларын билдиргендиле.