Сабанлада семиртгичлени къалай хайырланыргъа керекди

Къылкъылыла  ёсген сабанланы жаз башында семиртгичле бла байыкъландырырны аллында, биринчиден битимлени халларына къараргъа керекди, деп эсгертдиле Россельхозараны Къабарты-Малкъарда бёлюмюню специалистлери. Сёз ючюн, кюзлюк будайны минералла бла байыкъландырыугъа бек сакъ болургъа тийишлиди. Бай тирликли эмда терк ёсген сортлагъа  уа семиртгичлени элпек салыргъа керекди. Бегирек да азоту болгъанланы. Алай этилмей эсе, аладан артыкъ уллу тирлик сакъламазгъа. Аны себепли бу ишни кюнню халына, жерни энчиликлерине, битимле къалай ёсюм алгъанларына кёре тамамларгъа керекди.

Быйылны жаз башында битимлени азот бла багъыу  алгъаракъ башланса да боллукъду, дейдиле специалистле. Биринчи кере хауа 5-8 градусха жылынса чвлынады. Сёз ючюн, букюнледе. Семиртгични биринчи кере хайырланырны аллында, топуракъда нитратланы мардасын тинтирге керекди.

Экинчи кере  ол семиртгичге гербицидлени да къошса игиди. Алай этилсе, заранлы хансла ёсюм аллыкъ тюйюлдюле, анга кёре тирлик да игирек боллукъду.

Ишни къургъакъ, жел неда аяз урмагъан  кюн  танг алада неда ингирде бардырыргъа керекди. Аммиак селитраны мардасы бир гектаргъа 150-200 килограммды.