Электрокюч урларгъа тюзелгенлени тазир сакълайды

«Россети Шимал Кавказ» компанияны Къабарты-Малкъарда бёлюмюнде – «Каббалкэнергода» бардырылгъан кенгешде электрокючню эсеплемей хайырланыугъа чек салыуну юсюнден сёлешиннгенди. Бёлюмню башчысы Муртаз Каров айтханыча, былтыр рейдлени эмда тинтиулени кезиуюнде компанияны специалистлери токну эсеплемей хайырланнганлагъа 209 акт жазып бергендиле. Ол 33 миллион сом болады. Ызлагъа келишим этмей къошулуп, 8,2 миллион сом багъасына ток кюйдюргенлеге уа 32 акт жарашдырылгъанды. Саулай алып тергегенде, компаниядан 13,2 миллион киловатт-сагъат электрокюч урланнганды.

Кенгешде быллай шартланы ачыкълауну, низамгъа сыйынмагъанланы жууапха тартыуну, электрокючню къоранчларын азайтыуну юсюнден сёлешгендиле. Ток бла ышаннгылы жалчытыу да бу ишни къыйматлыгъына кёре боллугъун чертгендиле. Ызлагъа соргъан - сурагъан этмей къошулгъанла неда токну урлагъанла уа КоАП-ны 7.19 статьясына тийишлиликде жууапха тартыллыкъларын эсгергендиле. Алай этген гражданлагъа 10-15 минг сом тазир салынырыкъды, къуллукъчулагъа уа – 30-80 минг сом. Быллай шартны жиберген предприятие неда организация уа 100-200 минг сом тёлеуге къаллыкъды.