Коронавирус жукъгъанланы саны азая башлагъанды

Коронавирус жукъгъанланы саны тюше башлагъанына ушайды. Сёзге, 15 февральда ол 515 адамда ачыкъланнган эди – ол а арт айлада эм уллу кёрюмдюдю. 21 февральда уа ауругъанла азайып, бир кюннге вирус 493 инсанда табылгъанды.  Ауруудан сау болуп,   юйлерине 257 адам ашырылгъанды. 

КъМР-де Оператив штабдан белгили этгенлерича, пандемияны аллындан бери  COVID -19 республикада 54,4 мингден аслам адамгъа жукъгъанды. Ауруу жайылып башлагъан кезиуден  46,1 минг адам сау болгъандыла. Алай аны къыйынлыгъын кётюралмай ауушханланы саны 1689 пациентге жетгенди. Тюнене 6  саусуз  ауушханды. 

Бир кюннге 2,8 мингден аслам медицина тинтиу бардырылгъанды. Башында билдиргенибизча, аладан 493-сю адамгъа вирус жукъгъанын кёргюзтгендиле. Республикада бу ауруудан багъарча 4 госпиталь къуралгъанды, алада 1285 жер барды.  Артыкъда къоркъуулу жукъгъан аурууланы госпитальларында шёндю 961 саусуз турадыла. Аладан 92-си акъылбалыкъ болмагъанладыла. Жукъгъанланы арасында сабийден ауругъан тиширыула да бардыла – 10 жаш ана.

Реанимация бёлюмде 101 адам турады, аладан 11-ри ИВЛ-аппаратха къошулупдула, 50 саусузгъа  НИВЛ-аппаратны болушлугъу керекди.

11,1 мингден аслам адам инфекция жукъгъаны бла байламлы кеслерине  амбулатория амал бла багъадыла, аладан 2,7 минги – сабийледиле. Саусузланы арасында коронавирус жукъгъаны 6,4 мингден аслам адамда тохташдырылгъанды.

Бюгюнлюкде республиканы халкъыны 38,8 проценти коронавирусха къажау дарманны салдыргъандыла, ол санда аны эки бёлюмюн да 288,1 минг этдиргендиле.

Оператив штабны келечилери   температурагъыз кётюрюлюп, жётел этип, кёкюрегигиз къысып, вирус жукъгъанына ишеклик бар эсе, кесигизни багъыу мадарла этмей, поликлиникагъа сёлешип, врачны чакъырыргъа кереклисин эсгертедиле.

 Россейде бир кюннге ауруу жукъгъанланы саны 152,3 мингден озгъанды. Алай бла къыралда коронавирусдан 15,5 миллион инсан ауругъандыла, бюгюннге 12,4 миллион сау болгъандыла. Пандемияны аллындан бери аурууну къыйынлыгъын кётюралмай, 346 мингден аслам саусуз ёлгендиле.     Тюнене аны ауурлугъун кётюралмай  735 пациент ауушханды.   

Саулукъ сакълауну халкъла аралы организациясыны тарихлерине кёре, битеу дунияда   COVID -19 инфекция 418 миллион адамгъа жукъгъанды, жарсыугъа, андан ёлгенлени саны 5,8 миллиондан озгъанды.