Пекин хобуста

Бизни республикада тахта кёгетчилик бла кюрешгенле алыучуланы сейирлерине эс бурмай къоймайдыла. Ансыз да болмайды, нек дегенде къайсы ишдеча, мында да алыучу кёбюрек сурагъан затланы ёсдюрюу эмда чыгъарыу эм башына салынады.

Арт кезиуледе бизде рыноклада хобустаны «пекинская» деген тюрлюсюн эслерге боллукъду. Аны асламысында адамла кеслерини бахчаларында эмда предпринимательле гитче мюлкледе ёсдюредиле.

Пекин хобустаны ала къуру кесибизде сатыу бла чекленип къалмай, дагъыда он регионнга жибередиле. Россельхознадзорну Шимал Кавказда Управлениясыны билдириуюнде айтылгъаннга кёре, былтыр декабрьде андан 250 тоннаны Москвагъа, Санкт-Петербургга, Москва, Ленинград, Воронеж, Ярославль, Нижегородск, Киров, Самара областьлагъа, Краснодар крайгъа, Удмуртия республикагъа, Мордовиягъа эмда Татарстаннга жибергендиле. Ведомствону специалистлери продукцияны барына да кёз жетдиргендиле, фитосанитария жаны бла кемчиликлери болмагъанын тохташдырып, тийишли сертификатла да бергендиле.

Эл мюлкге болушлукъ

Быйыл Къабарты-Малкъарда эл мюлк бёлюмню айнытыугъа эки миллиарддан аслам сом къоратыллыкъды. Андан 2,3 миллиардны федерал бюджетден жиберликдиле, энтта да 80 миллион сомну уа республика кеси къошарыкъды. Ахча битимчиликни, малчылыкъны эмда эл мюлк кооперацияны айнытыугъа, фермерлеге билеклик этиуге, эл тийрелени комплекс халда тирилтирге жиберилликди, дегендиле республиканы Эл мюлк министерствосунда.

Анда айтханларына кёре, бюгюнлюкге федерал министерствону бла КъМР-ни Правительствосуну арасында бу жаны бла тогъуз келишим этилгенди. Андан сора да жылны ичинде энтта да келишимле къуралыргъа боллукъдула, дегендиле министерствода. Алагъа кёре андан да кёбюрек ахча келирге боллукъду.

Жараусуз пестицидле

Жалгъан пестицидле бла байламлы чурум жылдан жылгъа кюч ала барады. Эл мюлкде быллай жараусуз затланы хайырланыу бек уллу хата келтиреди. Аны ючюн тирлик азаяды, бирде саулай да къуруп кетеди, дагъыда тёгерек-баш багушланады, жер да осал болады. Жалгъан пестицидлени къурамын бир киши да тинтмейди, аны ючюн аланы ичинде не зат болгъаны асламысында белгисиз къалады.

Россельхозараны Къабарты-Малкъарда бёлюмюнде айтханларына кёре, ала былтыр бардыргъан тинтиулени кезиуюнде, продукцияны 38 проценти жалгъан болгъаны тохташдырылгъанды. Аланы бирлеринде хайырлы затланы мардасы аз эди, башхаларында уа чыртда табылмагъанды.

Алай бла пестицидлени къурамын билирге сюе эсегиз, аланы Россельхозарагъа элтип кёргюзтюгюз. Аны адреси: Нальчик, Малкъар орам, 100. Телефонлары: 8(8662)74-36-97, 74-25-74.