Спортчуларыбызны кёллендирир муратда

Белгилисича, Къыш Олимпиада Оюнлагъа къатышхан спортчуларыбызгъа болушлукъгъа деп къуралгъан акция саулай къыралда  бардырылады.  «Эльбрусоид» фонд да  андан бир жанында къалмагъанды. Ол Элбрус районну администрациясыны эм Элбрус излеу-къутхарыу бёлюмню болушлукълары бла тюнене Европада бек бийик Минги тауну этегинде флешмоб ётдюргенди.

-Бюгюнлюкде россейли спортчуланы къыралыбызны байрагъын кётюрюр онглары жокъду. Ол себепден, бу акция алагъа кёл этдирир мурат бла бардырылады. Хар субъект да аны кеси билгенича ётдюреди. Эльбрусоидчула бу жумушда 300 квадрат метрни тутхан россейли байракъны хайырланыргъа таукел болгъандыла. Алай бла аны 4200 метрге чыгъарып жайгъандыла,-дегенди Фондну Нальчикдеги филиалыны таматасы Аналаны Марат.

Ол билдиргеннге кёре, бу ишге ол тийреде учхан лыжачыла да сюйюп къатышхандыла. Ала къутхарыучулагъа байракъны жаяргъа болушхандыла эм спортчуларыбызгъа Олимпиада Оюнлада жетишимле тежегендиле.

Андан сора къутхарыучу жашларыбыз ол байракъны таудан энип, Азау талагъа тюшюргендиле. Алайда жашлагъа туристле, лыжачыла да къарсла бла тюбегендиле. Элбрус муниципал районну  таматасы Тохаланы Хыйса, администрацияны спорт эм жаш телюню ишлери жаны бла комитетини башчысы Жаппуланы Магомет да ыразылыкъларын билдиргендиле.  
 

- Бизни бу башламчылыгъыбызны КъМР-ни Башчысы Казбек Коков да  дурус кёргенди. Ол спортчуларыбызгъа бу халда кёл этдириу бек магъаналы болгъанын да чертгенди, - дегенди Аналаны Марат.