Коронавирусдан сау болгъанлагъа реабилитация этиу мадарла

КъМР-ни Парламентини спикерини орунбасары Мурат Кардановну башчылыгъында халкъны саулугъун сакълауну соруулары, коронавирус жугъуп, сау болгъанланы реабилациялары  жаны бла миллет проектлени жашауда бардыргъанда ведомствола аралы байламлыкъланы кючлеу жаны бла ишчи къауумуну жыйылыуун бардырылгъанды. 

 Анга Парламентни Урунуу, социал политика эм саулукъ сакълау комитетини башчысы Хусейн Кажаров, Физкультура, спорт эм туризм жаны бла комитетини таматасы Арсен Барагунов,  жууаплы министерстволаны бла ведомстволаны келечилери да къатышхандыла. 

Аны ача, вице-спикер республикада коронавирус жукъгъанланы саны ёсгени, аны ючюн а халкъны саулугъун сакълауну жангы амалларын излерге, реабилитация  мадарланы толтурургъа кереклисине эс бургъанды. 

-  КъМР-ни Парламенти жууаплы министерствола бла ведомствола тамамлагъан жумушланы бирге келишдирирге кереклисини юсюнден башламчылыкъ этгенди. Ол РФ-ни Президентини халкъны саулугъун, ырахатлы жашауун жалчытыу жаны бла  буйрукъларыны чеклеринде къуралгъан миллет борчлагъа жетиширге онг берликди. Бюгюннгю кенгеш да  сейирлери болгъан министерстволаны бла ведомстволаны эмда Къабарты-Малкъар къырал университетни  араларында байламлыкъланы    юлгюсюдю. Университет а саулукъ сакълаугъа, туризмге, медицина туризмге шёндюгю технологияланы сингдириу, реабилитация, курортология жаны  бла специалистлени юйретген арады,-дегенди Карданов.

Кенгешде психология илмуланы кандидаты, педагогика, психология, физкультура-спорт жаны бла билим бериу институтуну башчысы, КъМР-ни Парламентинде Жамауат советни таматасыны орунбасары Ольга Михайленко,   медицина илмуланы доктору,  профессор, КъМКъУ-ну факультет терапия жаны бла кафедрасыны башчысы, КъМР-ни Саулукъ сакълау министерствосуну штатдан тышында баш специалисти клиникалы фармаколог Мурат Уметов, педагогика, психология эм физкультура-спорт билим бериу институтну магистранты Анастасия Мошура сёлешгендиле.
Ала коронавирусдан сора реабилитация программаланы хазырлауну, алагъа психология жаны бла болушлукъну магъанасыны, жууаплы ведомстволаны араларында байламлыкъланы къурауну юслеринден айтхандыла. 

КъМКъУ-ну алимлери коронавирусдан сора реабилитацияны жангы мадарларын къурагъанларын белгилеп, аланы «Демография», «Саулукъ сакълау», «Туризм эм къонакъбайлыкъны индустриясы» миллет проектлени регион паспортларына къошууну амалларына да къаралгъанды. 

Сюзюлген соруугъа кеслерини кёз къарамларын саулукъ сакълау министр Рустам Калибатов, аны орунбасары  Заурбек Батыров, урунуу эм социал къоруулау министр Асанланы Алим,  курортла эм туризм  министр Мурат Шогенцуков, спорт  министр Ислам Хасанов, КъМКъУ-ну ректоруну къуллугъун болжаллы халда толтургъан Юрий Альтудов да билдиргендиле.

Кенгешге къатышханла реабилитация мадарланы игилендирирге, коронавирус адамны саулугъуна салгъан заранны андан ары тинтирге, бу жукъгъан ауруудан сау болгъанланы Элбрусну тийресинде эмда республиканы санаторийлеринде андан ары багъыуну сорууларын тынгылы сюзерге кереклисин чертгендиле.