Жамауат транспортну айнытыуну бир проекти къураллыкъды

 КъМР-ни Башчысы  Казбек Коков Россей Федерацияны Къырал Советини Транспорт жаны бла комиссиясыны  жыйылыууну кезиуюнде бардырылгъан семинар- кенгешге видеобайламлыкъла амал бла къатышханды. Анда сёз  «Къоркъуусуз эмда тынгылы жолла» миллет проектни чеклеринде жамауат транспортну айнытыуну бир проектин къурауну юсюнден баргъанды.

Жыйылыуну РФ-ни Президентини болушлукъчусу Игорь Левитин ачханды, кенгешге къатышханланы  - тийишли министерстволаны бла ведомстволаны келечилерин, регионланы башчыларын - алгъышлаб а РФ-ни Правительствосуну Председателини орунбасары Марат Хуснуллин сёлешгенди.

Россейни Президенти В.В. Путин Къырал Советни Президиумуну былтыр 19 октябрьде ётген жыйылыуундан сора берген буйрукъларына кёре, РФ-ни Правительствосу къыралда жамауат транспортну айнытыуну бир проектин жарашдырыуну къолгъа алгъанды. Регионлагъа да баш ишлери белгили этилгендиле. Алагъа жамауат транспортну инфраструктурасын, автобусланы бла троллейбусланы да  жангыртыу,  инвестицияла салынырча этиу,  белгиленнген борчланы кредитлени болушлукълары бла да тамамлау дегенча жумушла киредиле.

   Андан сора да, транспорт инфраструктураны  шахарланы бла эллени генеральный планлары бла бирге жарашдырыргъа, социал объектлени бла жашау журтланы орналыуларын эсге алыргъа кереклисини юсюнден да айтылгъанды. Халкъны транспорт бла жалчытыуну шёндюгю амалларына орта эмда бийик класслы автобусланы хайырланыу тап келишгени да белгиленнгенди.

Къабарты-Малкъарда КъМР-ни Башчысы Казбек Коковну буйругъу бла муниципал къуралыулада жамауат транспортну къаллай бири керек болгъаны тергелгенди. Автопарк жангыртылса, адамлагъа жамауат транспортда жюрюрге тынч да, ырахатлы да боллукъду.

«Тюрлениуле битеу да адамланы транспорт бла жюрюгенлери къоркъуусуз эмда къуралыулу болур,  жамауат транспорт тыйгъычсыз эмда жамауатха тап тюшген низам бла ишлер ючюн этиледиле. Ол бир жолгъа тамамланып къаллыкъ иш тюйюлдю. Аны  2023 жылда башларыкъбыз», - деп белгилегенди Казбек Коков,семинар-кенгешни эсеплерин чыгъара.