Эл мюлк жетишимлери бла къууандырады

Терек бахчалыкъ  

Къабарты-Малкъарны Эл мюлк министерствосундан билдиргенлерича, жаз башыны аллында терек бахчалыкълада кезиулю ишле къыстау барадыла. Тереклени  керексиз бутакълары бла чырпыларын  кетериу а баш жумушладан бириди.  

Специалистле айтханнга кёре, терек бахчалыкъ бай тирлик берирча кезиулю ишле заманында этилирге керекдиле. Бюгюнлюкде тийишли ишлени башларча хауа болум да  игиди. Ол санда жылыла келгенчи тереклени  жараусуз  бутакъларын бла чырпыларын кетерип бошаргъа керекди.

Эсге сала айтсакъ, былтыр республикада терек бахчалыкъда уруннганла  жемишледен бла наныкъладан   535,5 минг тонна жыйгъандыла. Ол буруннгу жыл бла тенглешдиргенде 103,5 процентге кёпдю. 

Аны бла бирге республикада терек бахчалыкъланы санына дайым къошулгъанлай барады. Сёз ючюн, былтыр 1,5 гектарда  неда 108 процентге кёп  жемиш эм наныкъ терекле орнатылгъандыла. 

Малчылыкъ

Шимал Кавказстатны эсеперине кёре,  былтыр Къабарты-Малкъарны эл мюлклерини барысында да   557,6 минг тонна сют сауулгъанды  неда буруннгу жылдан эсе 103,7 процентге кёп.

Аны бла бирге сагъынылгъан кезиуде тууар бла юй къанатлыланы этинден союлмагъан ауурлукъда 125,2 минг тонна сатылгъанды. Ол да буруннгу жылдан 104,7 процентге асламды. Жумуртхаладан да 243 миллиону сатылгъанды. Мында да 104 процент ёсюм эсленеди.

Битимчилик

Бюгюнлюкде Къабарты-Малкъар тахта кёгетледен бла жемишледен консервала жарашдырыу бла Шимал Кавказ федерл округда биринчи жерни алады. Саулай алып айтханда, былтыр 310 миллион банка чыгъарылгъанды, неда 2 процентге кёп.

Жюрюй келгенича, республика асламысында консервалагъа жашил къудоруну, помидорну, нашаны,  болгар чибижини эм татлы нартюхню хайырланады. Анга кёре, сагъынылгъан кезиуде консерва продукциядан   помидоргъа – 43, жашил къудоругъа – 19 эм нашагъа 17  процент жетеди.   

Аны бла бирге мирзеу эм къудору  битимледен да бай тирлик алыннганын белгилерчады. Чыгъарылгъан эсеплеге кёре, аны ёлчеми 1,320 миллион тоннагъа жетеди. Ол буруннгу жыл бла тенглешдиргенде 110 процентге кёпдю.

Мирзеуню асламысы нартюхге жетеди. Быйыл андан бир  миллион тонна жыйылгъанды, неда хар гектардан 71 центнер. Ол да  105 процентге артыкъды.

КъМР-ны эл мюлк министри Хасан Сижажев айтханнга кёре,  мирзеуден бай тирлик жыйылгъаныны магъанасы жерчиликде уруннганла кезиулю  жумушланы заманында тамамланнганларыны себебинденди. Ол санда  качестволу урлукъну, семиртгичлени, мелиорацияны эм бийик производстволу  техниканы тири хайырланнганларынданды.