Малчылыкъны айнытыугъа алланып

Былтыр Бахсан район эл мюлк бёлюмде жетишимлери  бла айырмалы болгъанды. Саулай отрасльни болумуну юсюнден кёп болмай баргъан муниципал кенгешде, эл мюлк, сатыу-алыу эмда жер байламлыкъла жаны бла  управленияны таматасы  Хамидби Каскулов доклад этгенди. Аны юсюнден бизге КъМР-ни Эл мюлк министерствосуну пресс-службасындан билдиргендиле.

Ол  айтханнга кёре, бюгюнлюкде мюлклени барысында да  тууар малланы саны  41057 тенгли бир барды. Аладан экиден бири, неда  17712-си ийнекледиле.  Аны бла бирге  къойла бла эчкилени саны 35405 башха жетеди. Ол буруннгу жыл бла тенглешдиргенде 9,1 процентге кёпдю. Юй къанатлыланы юсюнден айтханда да 542689 чакълы барды неда 5,9 процентге кёп.

Сагъынылгъан кезиуде  18895 тонна эт,  99817 тонна сют эм 4,0659 минг жумуртха сатылгъанды. Аланы барысында да  4,1;  5,4 эм 12,2 процент ёсюм эсленеди.

Бахсан районда жерлени эм хауаны болумну энчилиги тууарла бла ууакъ малланы жаярча  ахшы онгла бардыла. Бюгюнлюкде аны бла  кюрешген уллу биригиулеге:  «ТАиК», «Племенное хоз-во»,  «Сельхоз-комфорт», «Рассвет- Н», «Осман-Б» мюлклени санаргъа боллукъду. Андан сора да, Жанхотияда толусунлай  автомат халда ишлеген Шимал Кавказда биринчи болуп 130 тууаргъа  ферма сюелтилиннгенди. Ол бир къауум жылны жетишимле болдура келеди. 

Тюбешиуню ахырында Хамидби Каскулов муниципалитетге малчылыкъ  къыйматлы бёлюм  болгъанын белгилеп,   мындан арысында да аны айнытыргъа, аны бла байламлы  продукцияны да  производствосун ёсдюре барыргъа тийишлисин билдиргенди.