Организацияланы юч миллиард чакълы борчлары барды

Къабарты-Малкъарда суу бла жалчытхан организацияла   электрокюч ючюн   «Россети Северный Кавказ»  компаниягъа   1,9 миллиард сом чакълы берликлери барды. Алай бла ала республикада эм уллу борчлары болгъанланы санындадыла,- деп билдириледи энергокюч биригиуню пресс-службасындан.

Хайырланылгъан ток ючюн Нальчикде «Водоканал»  – 581,  «Баксанский водоканал» –  100,  Баксаненокда «Коммунсервис» – 63,  «Водсервис Исламей» – 50,  «Водник» - «Терский водоканал» – 37,2,  «Чегемвод» - «Чегемрайводоканал» – 31,3  эм Тырныауузда  «Горвода»  28,6 миллион сом берликлери барды.  Ала аслам борчлары болгъанланы биринчи тизмелериндедиле.

Энергетикле тёлемей уллу кёллюлюк этгенлеге   дайым борчларыны бир кесегин окъуна  жабаргъа кереклисин билдиргенлей турадыла.  Болсада «коммунальщиклени» кёбюсю аны къулакъгъа да алмайдыла.  Аланы ток ыздан кесерге жарамагъаны  ючюн а тёлеуле этилирча ишлерин сюдге берирге тюшеди.  

Андан сора да, быйыл  энергетикле организацияланы таматаларын субсидиялы жууаплылыкъгъа тартырча амалны тири хайырланырыкъдыла. Аны бла бирге регионну толтуруучу власть органлары бла да къысха  байламлыкъ жюрютюллюкдю.  

Эсге сала айтсакъ, быйыл биринчи январьгъа чыгъарылгъан эсеплеге кёре,   республиканы жашау журт – коммунал мюлк предприятиялары «Россети Северный Кавказ» компаниягъа юч милилард сом берликлери барды. Андан 332 миллион сом былтыр биринчи августдан сора ойнагъанды.    Проблемалы хайырланыучула борчларыны  жаланда 25  жабалгъандыла.