Жылны эсеплери кёллендиредиле

Россельхозараны Къабарты-Малкъарда бёлюмюнде бардырылгъан жыйылыуда ведомствону быйылгъа борчларыны юсюнден сёлешиннгенди. Аны башчысы Хасанбий Куржиев  бёлюмню лабораториясында сертификация жумушланы тамамлап башларгъа эмда «Цифралы фитомониторинг» бла «АгроСемЭксперт» программаланы сингдирип бошаргъа кереклисин эсгертгенди. Андан сора да, районладагъы бёлюмледе уруннган специалистлени урлукъчулукъ эмда битимлени къоруулау жаны бла  билимлерин ёсюрюрге  семинарла эмда мастер-классла бардырып тебиреуню магъаналыгъа санагъанды, деп билдиргендиле ведомствону пресс-службасындан.

Бёлюмню мюлк-техника онгларын кючлендириуню, аны биофабрикасыны бла лабораториясыны продукцияларын сатыуну  юсюнден да сагъынылгъанды жыйылыуда. Анга къатышханла дагъыда урлукъла эмда семиртгичле чыгъарыучула бла келишимле этерге, информация-консультация араны ишин айнытыргъа, эл мюлк товарла чыгъарыучулагъа бу жаны бла эмда методика материалла бла билеклик этерге оноулашхандыла.

Урлукъла ёсдюрюуню  юсюнден айтханда, бизни республиканы  иги онглары бардыла. Бегирек да нартюхню жангы гибридлерин жарашдырыуда. Битеу къыралда андан жыл сайын 100 минг тонна изленеди. Озгъан жылны эсеплерине кёре, 16 минг тоннасы Къабарты-Малкъарда чыгъарылгъанды. Талай жылдан а аны 25 минг тоннагъа жетдирир  умут барды. Россельхозараны регионда бёлюмю да быллай ишлеге тири къатышыргъа эмда къолдан келгенича себеплик этерге таукелди.