Боксдан тынгылы ара ишленирикди

  Шалушканы боксдан секциясында къонакъда Россейни боксдан баш жыйымдыкъ командасыны тренер штабыны келечилери болгъандыла.

  Жаш спортчула бла ушагъында баш тренер Виктор Фархутдинов бу секцияда юйреннгенле башха-башха жыллада къыралны жыйымдыкъ командасына киргенлерин, халкъла аралы эришиуледе атларын айтдыргъанларын белгилегенди. Виктор Борисович билдиргенича, аланы санында спортну халкъла аралы класслы эки устасы, Россейни спортуну 35 устасы, Европаны бла дунияны биринчиликлерини - 10, Россейни да биринчиликлерини да аслам призёрлары бла чемпионлары бардыла. Бу эсеплени келтире, баш тренер сабийлеге, аланы тренерлерине да ахшы чемпион тёрелени мындан арысында да бардырырларын тежегенди. Россейни Спорт министерствосуну келечиси, боксдан жыйымдыкъ командаланы куратору Сергей Назаров а къыралыбызны кёп субъектлери бу гитче элни спортда жетишимлерине сукъланыргъа боллукъларын чертгенди. Ала спортчулагъа профессионал экипировканы да саугъалагъандыла.

  Ахырында къонакъла Шалушканы администрациясыны башчысы Астемир Керефов бла боксдан шёндюгюлю араны проектин жарашдырыргъа келишгендиле, аны къурулушу 2023 жылда башланырыкъды, деп билдиредиле республиканы Спорт министерствосундан.