Энтта да «Эльбрус» туризм-рекреация комплексни айнытыуну юсюнден

КъМР-ни Башчысы Казбек Коков  «Эльбрус» туризм-рекреация  комплексни айнытыугъа жораланнган кенгешге видеоконференция халда къатышханды. Жыйылыуну Россейни экономиканы айнытыу министрини орунбасары Сергей Назаров бардыргъанды. Аны юсюнден бизге КъМР-ни Башчысыны бла Правительствосуну пресс-службасы билдиргоенди. 

2022 жылда курортда инфраструктураны  къурауну бла тийрелени тапландырыуну къыстау кезиую башланады. Аны бла байламлы ишни нормативлерин тохташдырыуну, «жол картада» 2022-2023 жыллагъа белгиленнген мадарланы юслеринден сёлешиннгенди кенгешде.

Федерал эмда регион властьланы бирге ишлеулерин айнытыр ючюн РФ-ни Экономиканы айнытыу министерствосунда бла КъМР-ни Правительствосунда ведомствола аралы ишчи къауум къуралгъанды. Казбек Коков бла Сергей Назаров аны сопредседательлери болгъандыла. Ишчи къауумгъа уа Кавказ.РФ  биригиуню башчысы Хасан Тимижев, КъМР-ни Правительствосуну Председателини биринчи орунбасары Муаед Кунижев, Россейни МЧС-ини КъМР-де Баш управлениясыны таматасы Михаил Надежин, Россейни Табийгъатны къоруулау министерствосуну Къырал политика эмда энчи халда сакъланнган табийгъат тийреле бла байламлы ишлени тап халгъа келтириу жаны бла департаментини директору  Ирина Маканова,  МВД-ни, МЧС-ни эмда  Элбрус муниципал районну келечилери киргендиле.
 «Эльбрус уллу жангырыуну жолундады. Аны бла байламлы борчланы толтуруугъа къырал  13 миллиард сом чакълы бир бёледи», - деп эсгертгенди Сергей Назаров, тюбешиуню ача.
 Казбек Коков  2021 жылда республиканы жокълагъан туристлени саны  миллиондан атлагъанын, инфраструктураны къурау тохтаусуз баргъанын, туризм бла байламлы объектлени къоркъуусузлукъларын кючлендириу жаны бла мадарла этилгенлерин билдиргенди. «Курортну уллу онглары бардыла, ол себепден биз  мындан ары бардырыллыкъ ишлеге хазырбыз», - деп чертгенди республиканы оноучусу. Ол Сергей Назаровха регионда туризмни  айнытыугъа уллу эс бургъаны ючюн уллу ыспас этгенди.
Хасан Тимижев  да 2022-2024 жыллада лыжалада учарча 24 объект эмда инфраструктураны жалчытырыкъ да жети объект ишленириклерини юсюнден билдиргенди. Аладан онусун къырал экспертиза дурус кёргенди эмда къурулуш ишле бардырыладыла.  Ала канат жолла бла трассаладыла.   Аланы 2022 жылны ахырына тамам этерге белгилене

 Михаил Надежин  билдиргеннге кёре уа, быйыл Россейни  МЧС-инде къутхарыучулагъа терк жыйылыучу  юйледен ючюсюн кётюрюрге эмда тохташдырыргъа мурат этиледи. Аладан бири Элбрусну къыбыла жанында 3850 метер бийикликде, экинчиси да шимал жанында 2500 эмда 3800 метр бийикликде орнатыллыкъдыла.
 Кенгешде сёз Минги тауну бла турист объектлени кир-кипчикден тазалауну, къар тюшюуден къорууланыуну эмда къутхарыучу службала бла байламлыкъны кючлендириуню юсюнден да баргъанды.
 Курорт тийреледе инфраструктураны къурауну чеклеринде таза суу бла жалчытыуну, кир сууланы кетериуню мадарлары да этиледиле. 2021 жылда КъМР-ни Башчысыны буйрукъларына кёре «Элбрус» ВТРК-ны суу бла жалчытыу жаны бла ишле тамамланнгандыла.  Минги тауну тийресин ичер суу бла жалчытырыкъ суу ыз тартылып бошалгъанды. Ол санда хар бирини теренлиги 65 метр болгъан 3 скважина къазылгъанды, 1500 кубометр сыйыннган 4 суу орун тохташдырылгъанды, дагъыда 11,4 километрге суу быргъыла тартылгъандыла.

Быйылны биринчи кварталында  Азаудан башлап Элбрус элге дери созулгъан канализация коллекторну жангыртыу жаны бла ишле башланырыкъдыла.
 Кенгешни ахырында Сергей Назаров  Кавказ.РФ корпорациягъа   Онбиреуленни ышыгъын» жангыртыуну эмда анда МЧС-ни бёлюмлерин орнатыуну онгларын сюзерге буюргъанды.  Кавказ.РФ-ни тюзюнлей къатышыуу эмда Россейни Экономиканы айнытыу министерствосуну башчылыгъы бла  2025 жылгъа Элбрусха солургъа келгенлени санын 1,1 миллионнга дери кёбейтирге, туризм эмда лыжала бла учуу бла байламлы инфраструктураны къураугъа инвесторла да къошулурча этерге, бир ненча канат жол ишлерге, лыжалада учарча трассаланы узунлукъларын созаргъа мурат этиледи.