Агропромышленный комплекс борчун 108 процентге толтургъанды

Былтыр Къабарты-Малкъарны агропромышленный комплекс бёлюмю экспортха 16,2 миллион доллар багъасына продукция ашыргъанды. Алай бла белгиленнген план 108 процентге толтурулгъанды, деп билдириледи КъМР-ни Эл мюлк министерствосундан.

Россейни Эл мюлк министерствосу бла КъМР-ни Правительствосуну келишимини чеклеринде «Халкъла аралы кооперация эм экспорт» миллет проектни «Агропромышленный комплексни продукциясыны экспорту» деген регион проектине кёре, республика 15 миллион долларгъа продукция сатаргъа онгу бар эди.

АПК-ны продукциясыны асламысы, хар замандача, мирзеу, татлы ашарыкъла, спирт къошулгъан ичгиле, суула эм крахмалды. Продукция кёбюсюнде Грузиягъа, Узбекистаннга, Тюркге, Азербайджаннга, Армениягъа, Киргизиягъа, Бирикген Араб Эмиратлагъа, Къазахстаннга, Тюркмениягъа эм башха тыш къыраллагъа ашырылады.