Женгил амалла бла жылны ахырына дери хайырланыргъа онг барды

Пенсия фонддан документлени алыуну женгиллендирилген амалы былтыр коронавирус бла байламлы кийирилген эди, ол 2021 жылны ахырына дери сакъланырыкъды. Аны хайырындан россейлиле фонд бла байламлы кёп жумушларын аны бёлюмлерине бармай толтураллыкъдыла.

Алай бла адамгъа жыл саны неда урунуу стажы жетгени бла байламлы пенсияны телефон бла неда гинсанны энчи кабинетин хайырланып тохташдырыргъа жарайды. Инсан ыразылыгъын бере эсе, ол иш бла жалчытхан организацияла ийген кёрюмдюлени хайырланып да тергеледи. Алагъа кёре пенсия коэффициентле, орта иш хакъ, сабийлеге, неда саусузгъа къарагъаны ючюн ишлемеген кезиуле да саналадыла. Адам пенсия жыл санына жетерге ала барысы да фондда жыйышдырыладыла, инсандан пенсиясын алыр ючюн, жангызда электрон заявление изленеди. 

Сакъатлыкъ бла байламлы берилген пособияланы битеу тюрлюлери ФРИ-де (Сакъатланы федерал реестри) жыйышдырылгъан эсеплеге кёре бериледиле. Инсан заявленияны къолдан неда электрон халда жазады, къалгъан шартланы фонд информация системадан алады. Реестрни хайырындан тёлеулени талайы заявлениясыз окъуна тохташдырыладыла, сёз ючюн, сакъатлыкъ ючюн берилген пенсияны болжалын созуу.

Алай бла фондну жер-жерли органлары адамлагъа быллай тёлеулени тергеуде себеплик этедиле, ол санда законнга кёре инсан кеси келтирирге тийишли документлени жыйышдырыуда да. Ала башха ведомстволагъа, иш бла жалчытхан организациялагъа, архивлеге, билим бериу учреждениялагъа эм башха жерлеге запросла иедиле, аны ючюн ПФ информация жаны бла байламлыкъла жюрютюрча келишимле тауусханды. Аны хайырындан гражданла, сёз ючюн, аналыкъ капиталны алыр неда юйню тутхан ёлгени бла байламлы берилген пособияны болжалын созар ючюн, шагъытлыкъ документлени излемейдиле.

Пенсия фонддан келген битеу тёлеулени юслеринден информацияны энчи кабинетде алыргъа боллукъду, аланы санында пенсиячылагъа эм пенсияны жууукъ заманда аллыкълагъа тийишли справкаланы, льготалагъа эркинлик берген къагъытланы бла выпискаланы да. Алагъа цифра мухур салынады, быллай документлени башха организациялагъа иерге да жарайды. Ишлегенле уа электрон кабинетлеринде пенсия коэффициентлерини, пенсия балларыны, урунуу жылларыны юсюнден билаллыкъдыла. Аналыкъ капиталны иелерине таплыкъгъа ала сайлагъан жумушлагъа къаллай бир ахча алыргъа жарарыгъы жазылады. 

Справка информация телефон бла да бериледи, аны ючюн инсандан код сёзню айтырын излерикдиле. Алгъа аны ючюн фондха заявление жазылгъанды, энди бу жумуш энчи кабинетде да тамамланады. Код сёзню хайырланыу телефон консультацияланы кезиуюнде толу информацияны алыргъа болушады.