Республикада элли мектеп тынгылы жангыртыллыкъды

КъМР-ни Башчысы Казбек Коков Москвада ВКС амал бла Россей Федерацияны Правительствосуну Председателини орунбасары Марат Хуснулинни башчылыгъында бардырылгъан Регионланы айнытыу правительстволу комиссияны президиумуну ишине къатышханды.

 Жыйылыуда «Билим бериуню айнытыу» къырал программаны чеклеринде школлагъа тынгылы ремонт этиуню бардырылыуу деген соруу сюзюлгенди. Бюгюнлюкде регионла федерал бюджетден субсидияла алыргъа къагъытларын жарашдыра турадыла.  Эл школлагъа 2022-2023 жыллада тынгылы ремонт этиллик программагъа  битеулю билим берген  учрежденияладан эллиси киргенди, деп билдиргендиле республиканы оноучусуну пресс-службасыны келечилери. 

Андан сора «Жашау журт эм шахарланы тапландырыу» деген миллет проект къалай бардырылгъанына къаралгъанды. Быйылгъы жылда  513 минг квадрат метр жашау журт хайырланыргъа берилгенди, 2022 жылны планларына кёре, 530 минг квадрат метр жашау журт ишленирге керекди.

Этилген тергеулеге кёре, 2021 жылда январь-ноябрь айлада жашау журтланы ишлеуню ёлчеми 427,4 минг квадрат метр боллукъду, ол кёрюмдю 2020 жыл бла тенглешдиргенде, 105,3 процентни тутады.

«Жашау журт», «Регион эм жер-жерли жолла» деген федерал проектлени чеклеринде  2024 жылгъа дери Нальчик шахар округну беш жангы районунда эм микрорайонларында жашау журтла сюелирикдиле эм инфраструктура жаны бла  къурулуш ишле да бардырыллыкъдыла. 

 Сёз Эркин Ёзен микрорайонда, Мишхидж котедж посёлокда, Хасанияны огъары жанында ишленирик котежд посёлокда,  Дубки-07 эм Сосруко дача посёлоклада инженер коммуникацияланы эм суу быргъыланы салыу бла къурулуш ишлени юсюнден барады.  Жашау журтла ишленирик белгиленнген жерледе  инфраструктура къурулуш жумушлагъа  «Жашау журтла» деген федеральный проектни чеклеринде 388 миллион сом бёлюнюрге айтылады.