Акционер общество атын алышындыргъанды

«Шимал Кавказны курортлары» акционер обществону мурдорунда къуралгъан СКФО-ну Айнытыу жаны бла бирикдирилген институтха жангы ат берилгенди. Мындан ары аны аты «Кавказ.РФ» АО деп жюрюрюкдю.

«Эльбрус», «Архыз», «Ведучи» эм жангыртыла келген «Мамисон» организацияны бойсунууунда къаладыла. Алада тау-лыжала  бла байламлы инфраструктураны къурулушу бардырылгъанлай турлукъду.

Аны бла бирге дагъыда инвестиция проектлеге ахча бёлюу да боллукъду. Алагъа займла 3 процент бла берилликдиле эм банкдан гарантия болса, проектни 70 процентин тутхан бир ахча алыр амал барды. Энчи экономика зоналада резидентлеге бютюн ахшы онгла да боллукъдула. Аланы проектлерини толу багъасыны 50 процентине софинансирование этилирча амалла къуралыпдыла.

СКФО-ну Айнытыу жаны бла бирикдирилген институтну борчу – округну регионларыны социал-экономика жаны бла айныуларына себеплик этиудю. Шимал Кавказны экономика жаны бла жангы амалларын ачыкълау жаны бла жууукъ кезиуде регионлада бёлюмле къураллыкъдыла. Ала «ачыкъ терезе» халда ишлерикдиле. Ол а инвесторлаггъа битеу административ жумушларын бир жерде тамамларгъа онг берликди. Россейни экономиканы айнытыу министрини орунбасары Сергей Назаров чертгеннге кёре, институт бизнесни бла къыралны байлашдыргъан орган боллукъду.

Бюгюнлюкде курортлада бек уллу жарсыула къонакъ юйледе жерлени жетишмеулери, энчи инвестицияла этгенлени санын ёсдюрюу, болгъан ишчи жерлени сакълау эмда аланы кёбейтиу, туристле асламыракъ келирча этиу бла байламлыдыла.

- Быйылны ахырына дери келе тургъан 10 жылгъа ишибизни планы хазыр боллукъду.  Анда алгъаннгы политика амалла хайырланырыкъ тюйюлдюле. Жангыларын излерикбиз. Инвесторла проектлери бла байламлы сорууларына тынгылы жууапла табарча онгла къураллыкъдыла, - деп билдиргенди «Кавказ.РФ» акционер обществону генеральный директору Хасан Тимижев.