Врачла билимлерин эм сынамларын да ёсдюргендиле

Кёп болмай Нальчикде   Диализ арада битеудунияда  бюйрекни кюнюне жоралап «Саулукълу бюйрекле: хар жерде, кимге да» деген аты бла илму-практика конференция ётгенди. Анга  терапевтле, нефрологла эм урологла да къатышхандыла. Конференцияны  Б.Браун атлы диализ клиникаланы сетьлерини медицина жаны бла таматасы, МГСМУ-ну «Нефрология» кафедрасыны доценти  Валерий Шило ачханды. Жыйылгъанланы алгъышлай Къабарты-Малкъар университетни  ректору Юрий Альтудов, КъМР-ни 

Саулукъ сакълау министерствосуну  уллу къауумгъа   медицина болушлукъ тапдыргъан бёлюмюню таматасы  Инна Мамхегова  сёлешгендиле. 

- Бюгюнлюкде КъМР-де гемодиализ болушлукъ берилген саусузланы саны  600 адамгъа жетеди. Ол себепден аланы заманында тинтир ючюн тюз диагноз салыргъа эмда багъарча мадар этиуге аслам эс берирге керекди.  Бу жаны бла жетишимли ишлер ючюн а специалистле билимлерин, сынамларын ёсдюргенлей турургъа керекдиле, дегенди Инна Мамхегова. 

«Диализ Нальчик» биригиуню таматасы Максим Акчурин бюгюнлюкде  Диализ ара  борчун  жетишимли тамамлагъанын  билдире,  быллай конференцияла  врачланы ишлеринде ахшы себеплик этгенлерин да    белгилегенди. 

Жыйылыуда Валерий Шило «Коррекция основных уремических синдромов у пациентов на програмном гемодиализе», КъМКъУ-ну медицина факультетини пропедевтика кафедрасыны таматасы  Лилия Эльгарова  «ХБП: современные стратегии ранней диагностики и нефро протекции», Нальчикни 1-чи номерли больницасыны  баш врачыны орунбасары Аксана Кардангушева «Лекарства и почки что нужна знать терапевту», Чочайланы Аминат да «Место визуализационных методов исследования в нефрологии: диагностическая значимость и безопасность» деген темалагъа  жораланнган докладларын окъугъандыла.    

Конференцияны чеклеринде  бир къуунчлы иш да болгъанды. Бизнесмен эм жандауурлукъчу  Юсуф Кабардоков  Диализ арагъа саусузланы  жюрютюрча саугъагъа машина бергенди. «Нефролига» организацияны таматасы Леус Макоев анга ыразылыгъын билдире, бюгюнлюкде  республикада бир ненча  Диализ ара ишлегенлерин, алада саусузлагъа хакъсыз бакъгъанларын эм игиси  уа энди  башха регионлагъа   жюрюрге керек болмагъанын да эсгергенди.