Право жаны бла хакъсыз болушлукъгъа кимле тийишлидиле?

КъМР-ни Жер эмда ырысхы бла байламлы халланы министерствосу хакъсыз юридический болушлукъ береди. Аны бу ведомствону жууаплылыгъы болгъан сферала бла байламлы жумушлада тамамлайды, консультацияла жазып неда алайлай айтып да тындырады. Ол санда заявленияланы, ходатайстволаны, тарыгъыуланы неда башха праволу къагъытланы толтурургъа болушады, къыралны неда республиканы законлары бла аллай амал бериле эсе, инсанны  сейирлерин сюдледе, федерал неда муниципал власть органлада жалчытады.

Алайды да, хакъсыз юридический болушлукъгъа бу категорияла тийишлидиле:

1) Юйюрлерини орталыкъ къолайлыкълары Къабарты-Малкъар Республикада жашау этерге жетерик ахчаны эм аз ёлчеминден алаша болгъанла неда кеслери алларына аллай бирден аз ахчагъа жашагъанла (мындан арысында – къолайсыз);

2) 1-чи эмда 2-чи группалары болгъан сакъатла;

3) Уллу Ата журт урушну ветеранлары, Россей Федерацияны, Совет Союзну, Социалист Урунууну эмда Россей Федерацияда Урунууну Жигитлери;

4) сакъат, ёксюз, атасыз неда анасыз къалгъан сабийле. Сора дагъыда аланы закон бла белгиленнген келечилери, ала аллай сабийлени юйюрге орнатыу бла байламлы жумушлары болуп быллай болушлукъ излеп келселе;

5) атасыз неда анасыз къалгъан сабийлени ёсдюрюрге алыргъа сюйген адамла, ала быллай жумуш бла байламлы болушлукъ излеп келселе;

6) ёксюз неда ата-анасыз къалгъан сабийни кесине жаш неда къыз этип алгъан адамла, ала аллай сабийни эркинликлерин жалчытыу эмда къоруулау бла байламлы жумушла бла келселе;

7) стационарда жумушла бла жалчытхан социал учреждениялада тургъан абаданла эмда сакъатла;

8) надзор учреждениялада эмда тутмакълада тургъан акъылбалыкъ болмагъанла. Аланы келечилери, ала аллай адамланы эркинликлерин эмда закон бла белгиленнген сейирлерин къоруулау жумушла бла келген эселе (уголовный иш ачылып, сюдню бардырыу бла байламлы вопросла ары кирмейдиле);

9) Россей Федерацияны 1992 жылда 2-чи июльда «Хакъсыз психиатрия болушлукъ бериуню эмда аны кезиуюнде гражданланы эркинликлерин къоруулауну юсюнден» законнга тийишлиликде хакъсыз юридический болушлукъ алыргъа эркинликлери болгъанла;

10) сюдню оноуу бла кеси жумушларына къараялмагъаннга саналгъан инсанлагъа эмда аланы закон бла белгиленнген келечилери, ала аллай адамланы эркинликлерин бла сейирлерин къоруулар умутда быллай болушлукъ излеп келселе;

11) бир тюрлю къыйын болумгъа тюшген гражданла. Аллай кезиуде ауушханны эри неда юй бийчеси, атасы неда анасы, сабийи. Къыйынлыкъгъа тюшюп ёлген адам кечиндирген, алай ол ёлгени бла аллай болушлукъдан къуру къалгъан гражданла. Къыйын болумда саулугъуна хата тюшгенле, аллай кезиуледе жашау журтларындан къуру болгъанла, мюлклерини бир кесегин эмда документлерин тас этгенле;

12) къыйын жашау болумгъа тюшюп, быллай болушлукъ алыргъа тийишли болгъан гражданла;

13) къыралны эмда Къабарты-Малкъарны башха законларына тийишлиликде быллай болушлукъ алыргъа эркинликлери болгъанла.

14) репрессиялагъа тюшюп, ызы бла реабилитация этилгенле;

15) Махтаулукъну эм (неда) Урунуу махтаулукъну орденлерини толу кавалерлери;

16) Уллу Ата журт урушну кезиуюнде фашистле эм аланы болушлукъчулары къурагъан концлагерьледе, геттолада эмда тутмакъ маталлы башха тюрлю жерледе тургъанла;

17) правону къоруулаучу органланы кеслерини борчларын толтургъан кезиуде жаралы болуп ауушхан келечилерини ата-аналары, юй бийчелери неда эрлери, 18 жыллары толмагъан эмда 23 жыллары жетмей, кеслери да очный халда окъугъан сабийлери.

18) социал жумушланы стационар халда жалчытхан организациялада жашагъан абаданла эмда сакъатла;

19) башха федерал неда республикалы законла бла хакъсыз юридический болушлукъгъа тийишли болгъан гражданла.

Быллай болушлукъ излеген гражданинни къолунда эм биринчиден паспорту эмда заявлениясы болургъа керекдиле. Андан тышында башында кёргюзтюлген хар категорияны къагъытлары бардыла: справкала, шагъатлыкъ этген документле, выпискала. Аланы толу тизмеси бла эмда быллай болушлукъ бериуню юсюнден битеу информация бла бу интернет сайтда шагъырейленирге боллукъсуз: https://minimush.kbr.ru/news/o-predostavlenii-besplatnoy-yuridicheskoy-p....