Юйге байланып къалыргъа сюймегенди

Индира бла Асхат юйюр къурагъанда, экиси да школда устазла болуп ишлей эдиле. Эгиз жашчыкъларына тёрт жыл болгъанлай, аланы ингилиз тилге  юйретип башлайдыла. Ана тил, орус, ингилиз, француз тилле: кеслери билгенни жашчыкъла да билсинле деген муратлары бар эди. Дерслени оюн халда  къурагъанлары себепли, жашчыкъла аланы бир уллу байрамныча сакълай эдиле.

Кюнден-кюннге, тынч-тынч, Индира бла Асхат энчи автор методика къурадыла. Школда директоргъа: «Сиз бизге тамата классланы бош берген сунабыз, биз гитчечикле бла аламат ишлейбиз», - деп махтандыла. Ол: «Да сора сабий садыбызда бир кёрчюгюз ишлеп», - деди. Ата-анала да бек къууандыла, ары дери бир къарыусуз устазгъа тарыгъыула жазгъандан эригип тура эдиле.  Шахарда  жангы методиканы хапары терк жайылды. Сабийлени бу школгъа кёчюрюп башладыла.

Асхатны  анасы Фатимат келини, жашы тири болгъанларына къууана эди. Жууукъларыны  къууанчларына, бушууларына баргъанларында, ата-аналадан кёп ыразылыкъ сёзле эшите эди. «Жашынг жангыз эсе да, кесинг ёсдюрюп, къыйналгъан эсенг да, къыйынынг зыраф болмагъанды, Аллахха шукур. Келининг кесигизча акъыллы», - дей эдиле.

Индира бла Асхат устаз конкурслада хорлап, кёлленип ишлей эдиле. Бир талай жылдан алыкъа школгъа жюрюмегенлеге ингилиз тилден хакъ тёленнген курсла ачдыла.

Алай  ортакъ багъа эди. Артда уа Асхат анасына: «Элде юйню сатып, ол ахчагъа къошакъгъа кредит да алып, шахарда сабий сад ачаргъа умутубуз барды. Сен а не айтаса?» - деди. Фатимат бир кесек тынгылады. Жаш адамла кеслери оноу этип, анга артда айтханларына бюсюремеди, алай сёз чыгъарыргъа сюймей: «Сюйгенигизни этигиз. Мен жолугъузну кесмезме», - деди.

Сабий садха деп шахарны къыйырында бир мекям сатып алдыла. Энди Индира бла Ахмат эрттенликде кетип, ингирде жетиде, сегизде юйге жыйыла эдиле. Фатимат эгиз жашчыкълагъа, юйге байланып къалды. Бир кюн:

- Келин, эгечиме барып бир ыйыкъ туруп къайтырыкъ эдим, - деди.

- Сабийле уа?

- Да, шукур, ахчагъыз барды, алагъа къараргъа адам алыгъыз.

- Ол айтханыгъыз? Мен жашчыкълагъа тыш адам къараса сюймейме.

-Мени не зат сюйгеними а сорургъа, билирге сюймеймисе?  

- Мен ана эсем, сиз да ыннасыз. Жашчыкълагъа къараргъа керексиз.

- Ким айтханды аны санга? Мен Асхатны кесим ёсдюргенме, бир киши да болушмагъанды манга. Сен да сабийлеринги кесинг ёсдюр. Дагъыда санга айтырыгъым: бу юй мени юйюмдю, бери келген да, келин да сенсе. Мен сенде къонакъда сени ахчанга жашагъанча сёлешме мени бла. Къысхасы, тамбла мен эгечиме бир ыйыкъгъа кетеме.

Фатимат бир ыйыкъдан къайтханында, жашы, келини да къара топпан болуп тура эдиле. Аны эсине алмай, экинчи кюн дачасына барып, сау кюнню анда солуп, ингирде гюл къысым бла къайтды юйюне. Ол ингирде жашы: «Биз сабий садны къатында фатар алгъанбыз. Ары кёчерикбиз», - деди. Айтымын бошагъанлай, аш отоудан чыгъып кетди. Жууап сакъламай эди. Да не этерик эди Фатимат? Жилямады. «Сюйгенлеринлей жашасынла. Алай манга къалай жашаргъа, не этерге оноу ала этерик тюйюлдюле. Юй чычханны тыш чычхан къыстагъанлай дегенлей, энди келинни оноуу бла жашаргъа къалгъан эди манга…алай сакълап турсун. Бир кюн жашасам да, эркин жашайым», - деп ичинден, чайын ашыкъмай ичди…