Тирликни къоранчсыз жыяр умутлудула

Кёп болмай  Пенза областьда Россейни  эл мюлк  министри Дмитрий Патрушев бардырып, агропромышленный комплекс бла аш-азыкъ рынокну оператив штабыны  кенгеши болгъанды.  Ол видеоконференция халда бардырылгъанды эм  асламысында  тирлик жыйыугъа бла къыралны жанындан аграрчылагъа болушлукъ тапдырыугъа жораланнганды.  Анга регионлада ведомстволаны келечилери да  къатышхандыла, ол санда КъМР-ни эл мюлк министри Хасан Сижажев да.

Тюбешиуде айтылгъаныча, 29 регионда мирзеуню оруу тири барады. Аны чеклеринде бюгюнлюкде  15 миллион тонна чакълы  тирлик жыйылгъанды. Болсада  Ара эм Приволжск федерал округлада быйыл кюнню  иссилигини хатасындан  къылкъылыланы иги айнымагъанлары  эм тирлик да аман болгъаны сагъынылгъанды.    Аны себепли Дмитрий Николаевич сагъынылгъан субъектледе  мындан арысында  къоранчла азыракъ болур ючюн  тирликни къыстау  жыяргъа  буюргъанды. Андан сора да, къышлыкъ битимлени салырча жерни заманында сюрюрге, урлукъну,  семиртгичлени да алгъадан  хазырлап къояргъа кереклисин эсгертгенди министр.   
Къабарты-Малкъарны юсюнден  айтханда мирзеуню оруу  бир тюрлю чырмаусуз,  графикге кёре барады. Бюгюнлюкде 30,7 минг гектарда     106 минг тонна тирлик алыннганды.

Андан сора да,  0,560 минг гектардан 13,8 минг тонна   картоф    жыйылгъанды. Орта эсеп бла  быйыл бир гектардан 146 центнер чыгъады.  Башха тахта кёгетледен  да 4,9 минг гектардан 44 минг тонна тирлик жыйылгъанды.