Федерал законлада къаллай жангычылыкъла бардыла

Сабийлеге тёлеуле, льготаланы юсюнден билдириу, къуллукълада ишлегенлеге башха къыралланы инсанлыгъын алыугъа чекле. Июльда кючюне кирген законланы юслеринден материалда окъугъуз.

 Сабийлеге  тёлеуле

1 июльдан РФ-ни Президентини Посланиясына кёре жарашдырылгъан законла  кючюне киредиле. Сёз сабийлеге социал тёлеулени юсюнден барады. Алай бла сабийден ауругъан тиширыулагъа, ала саулукъ сакълау учрежденияда ал кюнледе эсепге турсала, тёлеуле бир керени орунуна, хар айдан этилликдиле. Ахча къыйын жашау болумгъа тюшгенлеге бериледи.

Сабийни (8 жылдан 17 жылгъа дери) кеси ёсдюрген анагъа неда атагъа да этилликди къырал  себеплик. 

 Тыш къыраллы инсанлыкъ

Къырал эм муниципал къуллукълада, къырал эмда жер-жерли самоуправление органлада  ишлегенлеге эки къыралны инсанлыгъын алыргъа эркин этилмейди.  Сауутланнган кючледе, Росгвардияда, ФСБ-да, аскер прокуратурада, Следствие комитетни аскер бёлюмлеринде, ич ишле органлада, уголовно-толтуруучу эм от тюшюуге къажау федерал службада къуллукъ этгенлеге да салыннгандыла быллай чекле. Губернаторла, регионлада депутатла да киргендиле бу тизмеге.

РФ-ни Къырал Думасыны башчысы Вячеслав Володинни акъылына кёре, бу низам артыкъда магъаналыды. «Къыралыбызны, халкъыбызны сейирлерин сакълагъанланы бир инсанлыкълары болургъа керекди»,-дегенди ол законну юсюнден.

 Льготала, «Мир» карта

Инсанла къыралдан къаллай социал себепликге эркин болгъанларыны юсюнден Госуслуги портал бла бирге бирикдирилген телефон номерге сёлешип билирге боллукъдула. 

1 июльдан пенсияла, башха социал тёлеуле къуруда «Мир» банк картагъа ётдюрюллюкдюле. Тёлеулени Россейни почтасы, башха организацияла келтирген кезиуде   тюрлениуле боллукъ тюйюлдюле.

Налогланы тёлеу

Налогла жаны бла законлагъа да кийирилгендиле тюзетиуле. Сёзге,  транспорт налог алгъын кезиуде тёлеуледен кёп болса, ол жангыдан саналлыкъ тюйюлдю.

Товар аны чыгъаргъандан предприятиядан алыучулагъа жетгинчи дери ызланып турлукъду. Алай бла, законну хазырлагъанланы акъылларына кёре,  тыш къыралладан законсуз келтирилген товарланы азайтыргъа къолдан келликди.

  Энчи предприниматель, аны урунуу келишимге кёре  ишчилери жокъ эселе, чыгъаргъан затларын сатханда, жумушланы толтургъанда контроль-касса аппарат бла хайырланыргъа борчлу этилгенди.

Тереклени эсепге салыу, эл мюлк

Эсепге салыныргъа керекли тереклени тизмеси хазыр этилгенди. Терекни юсюнден шартла къырал эсепге кийирилмеген эселе, аны ташыргъа, асыраргъа, жарашдырыргъа жарамайды. Алай инсан терекни кеси кереклерине хайырлана эсе, аллай излемле салынмайдыла.

Эл мюлк страхование жаны бла келишимлени къабыл кёрюу женгил этилгенди. Табийгъат болумну хатасындан регионда неда федерал даражада ЧС низам кийирилген кезиуде, къоранчланы къайтарыугъа субсидияны ёлчеми да тохташдырылады.

 Будайны, андан жарашдырылгъан продукцияны качествосуна, къоркъуусузлугъуна къырал федерал контроль тамамланыллыкъды. Ол а будайны асырауда, ташыуда, жарашдырыуда жорукъла сакъланыр мурат бла этиледи.

Башха законнга кёре, налогла, страховой тёлеуле, пеня, тазирле тёленмей, борч жыйылса, предприятигъа этил спиртни, ичгини, спирти болгъан продукцияны   чыгъарыугъа лицензия бериллик тюйюлдю. Борч 3 минг сомдан кёп болса.